Путин Россия армияси сафини кенгайтирди

Россия Президенти Владимир Путин Россия Қуролли Кучларининг штатдаги умумий сонини 2 426 130 кишига етказиш тўғрисидаги фармонни имзолади. Бу ҳақда “Meduza” хабар берди.

Фармонга кўра, Қуролли Кучлар таркибидаги ҳарбий хизматчилар сони 1 миллион 535 минг нафарга етказилган. Қайд этилишича, ҳарбийлар сони 25 минг кишига кўпайган.

Маълум қилинишича, штат сонининг оширилиши Россия Қуролли Кучлари таркибида 2006 йилда тугатилган ҳарбий-қурилиш бўлинмаларининг қайта тикланиши билан боғлиқ.

Фармон жорий йилнинг 1 августдан кучга киради. Ҳужжатда қайд этилишича, ўзгаришлар Россия Қуролли кучлари таркибида ҳарбий-қурилиш бўлинмалари ташкил этилиши билан боғлиқ.

Маълумот учун, Путин жорий йилнинг 12 июнь куни ҳам Қуролли Кучлар штатидаги ҳарбий хизматчилар сонини 1 миллион 510 минг нафарга етказиш ҳақидаги фармонни имзолаган эди. Ўшанда штат сони қарийб 7,3 минг кишига оширилганди.

Шунингдек, Россия Хавфсизлик кенгаши раиси ўринбосари Дмитрий Медведев апрель ойининг охирида жорий йил бошидан буён 127 минг киши Россия Қуролли Кучлари билан шартнома имзолаганини маълум қилган. Унинг айтишича, яна 10 минг киши кўнгилли тузилмаларда хизмат қилиш бўйича шартнома тузган. Шу билан бирга, 2025 йилда 450 минг киши Россия армияси билан шартнома асосида хизмат қилиш учун рўйхатдан ўтган.

Эслатиб ўтамиз, аввалроқ Россия Президенти Владимир Путин Украинадаги урушда “янада дадилроқ ҳаракат қилиш” таклифига муносабат билдириб, бундай қарорлар Россия томони учун жанг майдонида йўқотишларга олиб келиши мумкинлигини айтган эди.