Путин Навальнийнинг Германияга кетишига шахсан рухсат берганини айтди

Россия Президенти Владимир Путин прокуратурага Алексей Навальнийга даволаниш учун Берлинга учишига рухсат бериш тўғрисида шахсан ўзи кўрсатма берганини айтди. “Валдай” мунозара клуби сессиясида Путин Ҳукумат ҳақиқат ҳам Навальнийни заҳарлашни хоҳлаганда уни Германияда даволаниши учун рухсат бермаган бўлармиди дея қўшимча қилди.

“Бу фуқаронинг турмуш ўртоғи менга мурожаат қилиши биланоқ, мен прокуратурага уни даволаниш учун хорижга чиқиш имкониятини текширишга кўрсатма бердим. Уни чиқармасликлари мумкин эди, чунки унинг суд тергови билан боғлиқ чеклови бор эди. Унинг хорижга чиқиши учун тақиқ бор эди. Аммо мен Бош прокуратурадан буни ҳал қилшни сўрадим ва у кетди”, деган Россия раҳбари.

У Германияда Навальнийнинг таҳлилларида “Новичок”нинг изи топилгани ҳақидаги баёнотларга ҳам тўхталиб ўтди.

“Биз айтлик: жиноят иши очиш учун юридик асос бўлиши учун бизга биологик материал ва расмий хулосани беринг, уни қайта текширайлик. Аммо ҳеч нима беришмаяпти буни қандай тушунтирасиз? Изоҳ йўқ”, деган Путин бўлаётган жараён ҳақида гапириб.

Президент расмий Москва ноодатий нарса сўрамаётганини, бу Германия билан келишувга мослигини қўшимча қилган.

Эслатиб ўтамиз, мухолиф сиёсатчи Алексей Навальний жорий йилнинг 20 август куни самолётда Томскдан Москвага кетаётганда тоби қочиб, Омскдаги шифохонага ётқизилди. Унга нима бўлгани номаълум бўлиб турган вақтда, сиёсатчининг тарафдорлари Навальний заҳарланганини иддао қилди.

Улар Навальнийни Германияга олиб кетиш ҳаракатига тушганда Омскдаги шифокорлар бунга рухсат бермади. Орадан икки кун ўтиб эса, Навальнийни исталган шифохонага кўчириш мумкинлигини айтишди ва сиёсатчи Берлинга олиб кетилди. Бу ҳол ҳам мухолифатчи тарафдорларида шубҳа уйғотди ва ишга Кремль аралашгани гумон қилинди.

Германияда текширувдан ўтказилгач, у заҳарлангани маълум бўлди. ГФР Ҳукумати сиёсатчи асаб тизимини фалажловчи “Новичок” гуруҳига кирувчи модда билан заҳарланганини айтди. Германия канцлери Ангела Меркель Навальнийнинг заҳарланиши бўйича Россиядан ҳисоб сўради. Унинг талабини Франция, Буюк Британия ва АҚШ ҳам қўллади. Европа парламенти эса Навальний билан юз берган ҳолат бўйича санкциялар жорий қилиш ҳақида резолюцияни тасдиқлади.

14 сентябрь куни Навальний ўзига келди ва сунъий нафас олдириш аппаратидан узилди. Эртаси куни у заҳарланганидан кейинги илк суратини ижтимоий тармоққа жойлади.

Аҳамиятли томони, “The New York Times” газетасининг ГФР хавфсизлик хизматидаги манбасига асосланиб хабар беришича, Навальний Германияда қолмоқчи эмас. У соғайгач, Россияга қайтиб, ўз миссиясини давом эттириш ниятида. 

Немис нашрлари Навальнийнинг заҳарланиши ортида Россия разведкаси борлигини ёзмоқда. Шунингдек, “Reuters” агентлиги Навальнийнинг Омскдаги шифохонадан кетиши бевосита Кремль рухсат берганини маълум қилди. Агентлик Омскдаги шифохонага яқин манба билан суҳбатлашган. У шифокорларга тўғридан-тўғри Кремлдан қўнғироқ бўлганини айтган.

Навальнийнинг сафдошлари эса Томскда у қолган меҳмонхона хонасидан “Новичок”нинг изи бор сув идиши топган. Заҳарни Германия мутахассислари аниқлаган.

Бу орада Россия Навальний билан боғлиқ барча айбловларни рад қиляпти. Кремлдагилар унинг заҳарланганини ҳам ёлғон деб аташмоқда. Аксинча, РФ Ғарб давлатлари ва НАТО “Новичок” гуруҳига кирувчи заҳарли моддани тайёрлашга муваффақ бўлган деб, уларни айблади.

Россия заҳарланишни инкор қилиб турган бир вақтда Кимёвий қуролларни тақиқлаш ташкилоти мутахассислар россиялик мухолиф сиёсатчи Алексей Навальнийнинг қонида заҳарли модда борлигини тасдиқлади.