Путин музокараларга “оғир вазнлилар жамоаси”ни жалб қилди
Олам
−
15 Февраль 2025 11083 2 дақиқа
Россия Президенти Владимир Путин АҚШ расмийлари билан Россия-Украина урушини тугатиш бўйича гаплашиш учун “кўп йиллик музокаралар тажрибасига эга оғир вазнлилар жамоаси”ни тузмоқда. Бу ҳақда кеча, 14 февраль куни “Bloomberg” хабар берди.
Агентлик манбаларининг хабар беришича, музокаралар гуруҳига Россия Президентининг ташқи сиёсат масалалари бўйича ёрдамчиси Юрий Ушаков, Россия Ташқи разведка хизмати директори Сергей Наришкин ва Россия тўғридан-тўғри инвестициялар жамғармаси (РФПИ) бош директори Кирилл Дмитриев киритилган.
“Bloomberg” таъкидлаганидек, Ушаков ҳам, Наришкин ҳам Россия қўшинларининг кенг кўламли бостириб кириши бошланганидан кўп ўтмай, Украина билан ўт очишни тўхтатиш бўйича биринчи музокараларда қатнашган. Дмитриев, ўз навбатида, 2025 йилнинг февраль ойида Россияда гиёҳванд моддалар контрабандаси учун 14 йиллик қамоқ жазосини ўтаётган америкалик мактаб ўқитувчиси Марк Фогелни озод қилиш бўйича АҚШ билан музокараларда иштирок этди.
Россия гуруҳи таркибига 2022 йилда Россия-Украина музокараларининг бошқа иштирокчилари ҳам кириши мумкин. Кремлга яқин манбага кўра, улар Украина вакиллари билан музокараларда ёрдам беради. Улар орасида Россия Президенти ёрдамчиси Владимир Мединский ҳам бўлиши мумкин.
Дмитриевнинг матбуот хизмати унинг эҳтимолий тинчлик музокараларида иштирок этишига изоҳ беришдан бош тортди. Кремль эса сўровга жавоб бермади.
Эслатиб ўтамиз, кеча, 14 февраль куни Мюнхен хавфсизлик конференциясида (MSC) журналистлар билан учрашувда Украина Президенти Владимир Зеленский ҳарбий душман Россия билан “жуда қийин” тинчлик музокараларини кутаётганини маълум қилди. У ҳар қандай вақтда “ҳақиқий музокаралар”га тайёр эканини айтди. Зеленскийнинг қўшимча қилишича, Украина томони Россия ҳарбий агрессиясини тўхтатишнинг турли йўлларини – тинчликпарвар қўшинлар контингентидан тортиб, хавфсизлик кафолатлари ва НАТОга қўшилишгача бўлган масалаларни муҳокама қилишга тайёр.
Live
Барчаси
