Путин Ким Чен Инни қандай таомлар билан сийлади?

Россия Президенти Владимир Путин Шимолий Корея етакчиси Ким Чен Ин шарафига уюштирган расмий тушликда ўз меҳмонини Сибирь ва Узоқ Шарқ таомлари билан сийлади. Бу ҳақда ТАCC хабар берди. 

Дастлаб юқори мартабали меҳмонларга анжир ва нектаринли ўрдак салати таклиф қилинган. Кейин Камчатка қисқичбақаси ва амур балиғи шўрваси билан чучвара тортилган.

Иссиқ таомлардан олдин меҳмонларга облепиха шарбатини татиб кўриш таклиф қилинган. Анъанага кўра, асосий таом сифатида қўзиқорин ва картошка билан бакир балиқлари ҳамда пиширилган сабзавотлар билан мол гўшти келтирилган.

Десерт эса қарағай ёнғоқлари ва қуюлтирилган сут билан тайга брусника мевасидан иборат бўлган. Ичимликларга келсак, КХДР раҳбари рус виноларини ҳам татиб кўрган. 2021 йилги узум  ҳосилидан оқ вино ва 2020 йилги ҳосилдан қизил вино тақдим этилган. 

Тантанали қабул чоғида Шимолий Корея етакчиси Ким Чен Ин Россиянинг ғалабаси, унинг Президенти Владимир Путиннинг саломатлиги ҳамда Россия-Корея муносабатларининг мустаҳкамланиши учун қадаҳ кўтарган.

“Россия Федерациясининг ҳурматли Президенти, ўртоқ Владимир Владимирович Путиннинг мустаҳкам соғлиғи, буюк Россиянинг янги ғалабаси, Россия-Корея дўстлигининг узлуксиз ривожланиши ва мустаҳкамланиши, бу ерда ҳозир бўлган барчанинг саломатлиги учун қадаҳ кўтаришни таклиф қиламан, ўртоқлар”, деган Ким Чен Ин. 

Ўз навбатида, Владимир Путин ҳам Россия Федерацияси ва КХДР ўртасидаги дўстликни мустаҳкамлаш учун қадаҳ кўтариб, икки халқнинг дўстлиги ҳақида мақолларни келтирган.

“Кореяда “Янги кийим яхши, эски дўст яхши” деган мақол бор. Бизнинг халқимизда эса “Икки янги дўстдан кўра, бир эски дўст афзал”, дейишади. Бу халқ донолиги мамлакатлар ўртасидаги замонавий муносабатларига тўлиқ мос келади. Россия Федерацияси ва Корея Халқ Демократик Республикаси ўртасидаги дўстлик ва ҳамкорликни янада мустаҳкамлаш, халқларимиз фаровонлиги ва тотувлиги, ўртоқ раис саломатлиги учун “тост” айтишни таклиф этмоқчиман”, деган Россия Президенти.

Бундан ташқари, давлат раҳбарлари ўртасида музокаралар ўтаётган “Восточний” космодромида Путин Ким Чен Инга Россиянинг Aurus автомобилларини кўрсатган. Ким Чен Ин машинани аввалига ташқаридан кўздан кечирган, сўнг орқа йўловчи ўриндиғига ўтириб ичкаридан унинг қулайлигини текширган. Шу билан бирга, Путин мавқедошига автомобилнинг хусусиятлари ҳақида гапириб берган. Кейинчалик улар бошқа моделдаги иккинчи Aurus’га ўтирган.

Маълумот учун, Ким Чен Ин Россиянинг Амур вилоятига ўз поездида етиб келган. Вагонлардан бирида у ўзининг шахсий Maybach лимузинини олиб келган, темирйўл станциясидан учрашув жойига ҳам у айнан ўз билан Maybach’ида келган.

Эслатиб ўтамиз, жорий йилнинг 10 сентябрь куни Ким Чен Ин Пхеньяндан жўнаб, Россияга махсус поездда йўл олганди. Кеча, 12 сентябрь куни Россияга келган Ким Чен Ин Табиат вазири Александр Козлов ва Приморск ўлкаси губернатори Олег Кожемяко билан музокара ўтказди. Бугун, 13 сентябрда Шимолий Корея етакчиси Президент Путин билан “Восточний” космодромида учрашди. Улар қисқа суҳбатдан сўнг космодромдаги объектларни кўздан кечирди. Кейин эса давлат раҳбарлари бошчилигидаги делегацияларнинг музокаралари бўлиб ўтди.