ПСЖ футболчиси одам савдоси айбловларини рад этди

Аввалроқ, “Пари Сен-Жермен” ҳимоячиси Люка Эрнандес ва унинг рафиқаси Викторию Триайга одам савдоси ва ноқонуний меҳнат айбловлари қўйилгани ҳақида хабар берилган эди. Энди Люка Эрнандес бу айбловларни рад этиб, бу ҳақиқатга тўғри келмаслигини айтди. Бу ҳақда футболчи Instagram саҳифасида маълум қилди.

“Биз ўзини дўст сифатида кўрсатган ва ҳаётини биз билан бўлишган одамларга ишондик. Бу ишончга хиёнат қилинди. Биз ҳеч қачон ёмон ният билан ёки қонунни бузиб ҳаракат қилмаганмиз, уларга инсонийлик нуқтаи назаридан ёрдам бердик”, дейди Эрнандес.

Шунингдек, Эрнандес ва Триай муаммони қонуний доирада ҳал қилишларини таъкидлаган. 

“Бу вазият оиламизга чуқур қайғу келтирди. Ҳозирда масала суд органлари томонидан кўриб чиқилмоқда, ижтимоий тармоқлардаги ҳикоялар эмас, фактлар ҳисобга олинади. Биз одамларни одоб-ахлоқ, вазминлик ва ҳурматга чақирамиз”, дея қўшимча қилади Люка Эрнандес

Маълумот учун, Мари исмли 27 ёшли колумбиялик аёл 2024 йил кузида Францияга келиб, Эрнандеснинг уйида ишлашни бошлаган. Кейинчалик аёлнинг оиласи ҳам Францияга кўчиб ўтган. Адвокатининг сўзларига кўра, уларга нақд пул тўланган ва меҳнат шартномасиз ишлатилган, ижтимоий таъминот ёки ишсизлик нафақаси берилмаган.

Марининг сўзларига кўра, Эрнандеснинг оиласи унга ва унинг яқинларига кам маош тўлаган, қул каби муомала қилган ва қонуний яшаш ваъдасини берган, лекин амалга оширмаган.