Перуда янги ўсимлик турига Месси номи берилди

Перуда аниқланган ва йўқолиб кетиш хавфи остида бўлган янги ўсимлик турига аргентиналик футболчи Лионель Месси шарафига Salvia messii – “Месси ўсимлиги” деб ном берилди. Бу ҳақда “Agencia Andina” хабар берди.

Ўсимлик бундай номни Аргентина терма жамоаси либосининг рангларига ўхшаш оч кўк ва оқ гуллари туфайли олган. У ялпиздошлар оиласига мансуб бўлиб, мазкур оилага кирувчи айрим ўсимлик турлари антиоксидант, яллиғланишга қарши ва антисептик хусусиятлари билан машҳур.

Маълумот учун, Лионель Месси 2023 йилдан буён АҚШнинг “Интер Майами” клубида тўп сурмоқда. У фаолияти давомида Испаниянинг “Барселона” ва Франциянинг “Пари Сен-Жермен” жамоаларида ҳам ўйнаган.

Аргентиналик футболчи 2022 йилда жаҳон чемпиони бўлган, 2008 йилги Олимпия ўйинларида олтин медални қўлга киритган ва Америка Кубогида икки марта ғолиб чиққан. Шунингдек, Месси саккиз марта “Олтин тўп” совринини қўлга киритиб, бу борада рекорд ўрнатган.