Пеле FIFAʼнинг “Best Forever” мукофотига сазовор бўлди
Спорт
−
28 Февраль 2023 3343
FIFA Бразилия терма жамоасининг уч карра жаҳон чемпиони марҳум Пелени “Best Forever” мукофотига лойиқ деб топди ва кеча, 27 февраль куни бўлиб ўтган маросимда унинг оила аъзоларига совринни топширди. Бу ҳақда “Chempionat” нашри хабар берди.
Кеча, 27 февраль куни Парижда 2022 йил ҳисобида “FIFAʼнинг энг яхши футбол мукофотлари” (FIFA Fotboall Avards 2022) тақдирлаш маросими бўлиб ўтди.
Унда йилнинг энг яхши футболчилари учун мукофотлар тақдим этилган. Эътиборлиси, мукофот эгалари орасида Пеле номи ҳам бўлган. FIFA уни хотирлаб, “Best Forever” (абадиятнинг энг яхшиси) мукофоти билан тақдирлаган. Совринни топшириш учун саҳнага собиқ Бразилия терма жамоаси ҳужумчиси Роналдо Луис Назарио таклиф қилинган ва мукофотни Пеленинг рафиқаси Марция Аоки қабул қилиб олган.
Таъкидлаш жоизки, FIFA расмий сайти Пелени 1279 та (2 та тўп қўлда урилган дея ҳисобга олинмаган) гол урганини кўрсатмоқда. Ушбу тўп сони билан у Гиннеснинг рекордлар китобида турибди.
Эслатиб ўтамиз, афсонавий ҳужумчи Пеле 2022 йил, 29 декабрь куни 82 ёшида бир ойлик даволанишлар самара бермай, саратон касаллигидан вафот этган.
Муштарий Ғаниева
Live
Барчаси
