Павел Дуров Парижда 6 соат сўроқ қилинди

Telegram асосчиси ва раҳбари Павел Дуров Францияда мессенжернинг жиноий фаолиятларга эҳтимолий шериклиги юзасидан олиб борилаётган тергов доирасида яна судьялар томонидан сўроқ қилинди. Бу ҳақда ишга яқин манбага таяниб, “Le Figaro” газетаси хабар берди.

Қайд этилишича, Павел Дуров жорий йилнинг 8 июль куни Париждаги тергов судьялари томонидан олти соатдан ортиқ вақт давомида сўроқ қилинган. Сўроқдан кейин унинг адвокатлари Кристоф Энгрен, Робен Бенсар ва Гийом Мартин журналистларга баёнот берган.

“Павел Дуровга нисбатан айблов эълон қилинганига қарийб икки йил бўлганига қарамай, ҳанузгача бу айбловларнинг асосли эканини тасдиқлайдиган ҳеч қандай далил мавжуд эмас”, дейди улар.

Адвокатларнинг айтишича, мазкур иш бўйича Францияда ҳам, Европа суд инстанцияларида ҳам шикоятлар киритилган.

Дуров маҳаллий вақт билан соат 10:00 атрофида Париж судига борган. Ишга яқин манбанинг сўзларига кўра, бу унинг 2024 йилда айблов эълон қилинганидан бери тўртинчи марта тергов судьялари томонидан сўроқ қилиниши бўлган.

Франция адлияси Россияда туғилган, Франция ва Бирлашган Араб Амирликлари фуқаролигига эга бўлган миллиардер тадбиркорни Telegram платформасида содир этилаётган ноқонуний фаолиятларга қарши етарлича чора кўрмаганликда айбламоқда. Терговчилар фикрича, платформада модерациянинг етарли эмаслиги ва ҳуқуқ-тартибот органлари билан ҳамкорлик қилинмагани жиноятчиларга қулай шароит яратган.

2024 йил декабрь ойида Дуров судьяларга Telegram’ни 2013 йилда акаси билан “жиноятчилар учун” яратмаганини айтган. Шу билан бирга, у платформада жиноятчилар ҳам мавжудлигини тан олиб, улар “жуда кичик улуш”ни ташкил этишига қарамай, вақт ўтиши билан уларнинг сони ҳам ошганини билдирган.

Дуров 2024 йил август ойи охирида Париж яқинидаги Ле-Бурже аэропортида қўлга олинганидан сўнг Франция ҳуқуқ-тартибот идоралари Telegram билан ҳамкорлик яхшиланганини қайд этмоқда. Бироқ Telegram бу баҳога қўшилмайди.

“Дуров Францияда ҳибсга олинганидан кейин ўзгарган ягона нарса шуки, Франция ҳокимияти Telegram’га суд сўровларини энди тўғри тартибда юбора бошлади”, деган платформа вакиллари.

Сўнгги йилларда Париж прокуратураси йирик интернет платформаларига нисбатан фаол терговлар олиб бормоқда. Telegram’дан ташқари, X (собиқ Twitter), Kick стриминг платформаси ҳамда TikTok иловаси фаолияти юзасидан ҳам текширувлар бошланган.

Айни пайтда Павел Дуров X эгаси Илон Маскни қўллаб-қувватлаган. Маск раҳбарлик қилаётган платформага нисбатан ҳам болалар порнографияси тасвирларини тарқатишга шериклик қилиш каби гумонлар бўйича суд тергови олиб борилмоқда.

“Макрон Францияси жиноий терговларни сўз эркинлиги ва шахсий ҳаётни чеклаш воситаси сифатида қўллаб, ўз легитимлигини йўқотмоқда”, деган эди Дуров жорий йил апрель ойида.

Эслатиб ўтамиз, аввалроқ Павел Дуров ўз каналида Европа Иттифоқи ўз назоратидаги нодавлат ташкилотлар ва оммавий ахборот воситалари орқали кузатув ҳамда цензурани кучайтиришга бўлган уринишларини оқлашга ҳаракат қилаётганини ёзганди.