Дуров ЕИни Telegram’га босим ўтказишда айблади

Европа Иттифоқи ўз назоратидаги нодавлат ташкилотлар (ННТ) ва оммавий ахборот воситалари орқали кузатув ҳамда цензурани кучайтиришга бўлган уринишларини оқлашга ҳаракат қилмоқда. Бу ҳақда Telegram асосчиси ва эгаси Павел Дуров ўз каналида маълум қилди.

Унинг сўзларига кўра, Европанинг AI Forensics нодавлат ташкилоти Жорж Сорос томонидан молиялаштирилади ва ушбу ташкилот Европа комиссияси манфаатлари учун ишлайди. 

“AI Forensics ташкилоти Telegram’ни муаммо деб ҳисоблайди, чунки одамлар бошқа ижтимоий тармоқлардаги контентни мессенжернинг ёпиқ гуруҳларида муҳокама қилишлари мумкин”, деб ёзди Павел Дуров.

Шунингдек, у France24 давлат телеканалининг AI Forensics тадқиқотига таянилган мақоласидан скриншот илова қилган. Ушбу тадқиқотда айтилишича, Telegram’нинг қарийб 25 минг фойдаланувчиси болалар порнографияси, дипфейклар (сунъий интеллект ёрдамида яратилган сохта тасвирлар) ва аёлларнинг розилигисиз олинган очиқ фотосуратларини тарқатиш ҳамда сотишда иштирок этган. Тадқиқот муаллифларининг тахминича, бундай материаллар учун бошқа машҳур ижтимоий тармоқлар манба бўлиб хизмат қилган, мессенжер эса “боғловчи тугун” вазифасини бажарган.

“Ушбу “нодавлат” ташкилотнинг ақл бовар қилмас иддаолари глобал нашрлар (“El Pais”, “Der Spiegel”, “Wired” ва AFP) томонидан тарқатилмоқда, улардан эса Франциянинг “эркин” матбуоти (“Le Parisien”, “20 Minutes”, “Ouest-France”, “Le Figaro”) нусха кўчирмоқда”, дейди Павел Дуров.

У, шунингдек, жамоатчиликни манипуляция қилишга қаратилган бу каби уринишларнинг олдини олиш зарурлигини, чунки улардан одамлардаги эркинликни тортиб олиш учун фойдаланилаётганини қўшимча қилган.

Telegram жамоасининг билдиришича, бу каби ноқонуний мазмундаги ҳамжамиятларнинг бошқа ижтимоий тармоқларга боғланиб қолгани, мессенжерда бундай гуруҳларнинг ривожланишига ёрдам берадиган тавсия алгоритмлари йўқлигидан далолат беради.

Эслатиб ўтамиз, аввалроқ Павел Дуров ўзининг асосий рақобатчиси WhatsApp’га нисбатан кескин баёнот билан чиққанди. Хусусан, у WhatsApp’даги шифрлашни тарихдаги энг йирик фирибгарлик бўлиши мумкинлигини айтганди.