Озарбайжон Ганжага учирилган ракеталар учун қандай жавоб беришини очиқлади

Олам 14084
image

Озарбайжон Президентининг ёрдамчиси Ҳикмат Ҳажиевнинг маълум қилишича, расмий Баку Ганжа шаҳрига уюштирилган ҳужум учун фақатгина қонуний ҳарбий объетларни нишонга олади.

У фуқаролик нишонлари ҳужумга учрамаслигини маълум қилди.

“Фуқаролик нишонлари ва фуқаролар Озарбайжон нишонига айланмайди. Озарбайжон фақатигина қонуний ҳарбий объектларни нишонга олади. Бу Озарбайжоннинг позицияси”, деган Ҳажиев.

Аввалроқ, Озарбайжоннинг йириклиги бўйича иккинчи шаҳари Ганжа ракета ҳужумига учрагани ҳақида хабар берган эдик. Шаҳарнинг аҳоли турар-жой қисмига тушган иккита ракета натижасида 13 киши ҳалок бўлди ва 40 дан ортиқ одам жароҳатланди.

Эслатиб ўтамиз, Озарбайжон ва Арманистон Россия воситачилигида Тоғли Қорабоғда ўт очишни тўхтатишга келишганди. Сулҳ асирлар ва жасадларни алмашиш мақсадида тузилганди.

Расмий Бакуга кўра, Арманистон Қуролли Кучлари жорий йилнинг 27 сентябрь куни соат 06:00 дан бошлаб Озарбайжонга қарши кенг кўламли провокацияларни амалга оширди, бутун фронт бўйлаб Озарбайжон армиясининг позицияларини, шунингдек, олдинги чизиқ зонасида жойлашган аҳоли пунктларини ўққа тутди.

Арманистон ҳужум Озарбайжон қуролли кучлари томонидан бошланганини айтмоқда. Озарбайжон эса қуролли тўқнашувга нисбатан жавоб ҳужумлари бошлаганини расман эълон қилиб, Арманистон чегарасидаги тинч аҳоли вакилларини чегара ҳудудларидан четга чиқишларини сўради.

Ҳолат бўйича Озарбайжон Республикаси Президенти Илҳом Алиев халққа мурожаат билан чиқиб, тўқнашув Озарбайжоннинг провокацияси эмаслигини айтди.

Никол Пашинян эса мамлакатда ҳарбий ҳолат ва умумий сафарбарлик эълон қилди.  Бунинг ортидан Илҳом Алиев мамлакатда ҳарбий ҳолат ва комендантлик соати эълон қилиш ҳақидаги фармонга имзо чекди. Шунингдек, Алиев 28 сентябрь куни қисман сафарбарлик эълон қилиш ҳақидаги ҳужжатни имзолади

Озарбайжон ва Арманистон ўртасида кескинлик авж олгандан кейин Ташқи ишлар вазири Сергей Лавров икки мамлакат Ташқи ишлар вазирлари билан телефон орқали мулоқот қилиб, уларни музокаралар столига қайтишга чақирган эди. Президент Владимир Путин эса Никол Пашинян билан мулоқот қилиб, масалани тинч йўл билан ҳал этишни тавсия қилди. Бу орада Озарбайжон Президенти Илҳом Алиев асосий куч ва дастакни Туркия Республикасидан олаётгани маълум бўлди. Шу куни Туркия ва Озарбайжон Президентлари телефон орқали мулоқот қилдилар ва Эрдўған турк халқи ва давлати Озарбайжонни бор имконияти билан қўллаб-қувватлашини эслатди

Озарбайжон ва Арманистон ўртасидаги Тоғли Қорабоғ можароли зонасидаги вазият кўп жиҳатдан Россияга боғлиқ. Россия Бирлашган Миллатлар Ташкилоти Хавфсизлик Кенгашининг доимий аъзоси, шунингдек Европада хавфсизлик ва ҳамкорлик ташкилоти Минск гуруҳининг ҳамраиси. 1 октябрь куни гуруҳ ҳамраислари – АҚШ, Россия ва Франция Тоғли Қорабоғ масаласида қўшма баёнот эълон қилдилар

Суннатилла Абдуллаев
Мақолага баҳо беринг
Баҳолаганлар: 227
Рейтинг: 2.9
t
×