Опа-сингил Мирзиёевалар Ўзбек Миллий қўғирчоқ театрига борди

Ўзбекистон Президенти Администрацияси раҳбари Саида Мирзиёева ва Ўзбекистон Республикаси Президенти ҳузуридаги Ижтимоий ҳимоя миллий агентлиги директорининг биринчи ўринбосари, Ўзбекистон Миллий Паралимпия қўмитаси раисининг биринчи ўринбосари, World Aquatics Бюроси аъзоси Шаҳноза Мирзиёева Ўзбек Миллий қўғирчоқ театрида Вильгельм Гауф эртаги асосида саҳналаштирилган “Халифа Лайлак” спектаклини томоша қилди. Бу ҳақда Саида Мирзиёева ўзининг Telegram-каналида ёзиб қолдирди.

“Биз Ўзбек Миллий қўғирчоқ театрига бориб, олам-олам завқ олдик. Вильгельм Гауф эртаги асосида саҳналаштирилган “Халифа Лайлак” спектаклини томоша қилдик. Бу – инсон иродаси ва ўзликни англаш йўли ҳақидаги биз учун ҳам қадрдон, севимли асардир”, дея ёзган Мирзиёева.

Унинг қўшимча қилишича, реконструкциянинг биринчи босқичи якунланиши билан театр ҳаёти яна жонланган.

“Бу ерда спектакллар намойиш этиляпти, болаларнинг қувноқ овозлари янграяпти, ота-оналар фарзандлари билан жам бўляпти. Ушбу масканнинг тарихий қиёфаси, ўзига хос руҳи авайлаб сақлаб қолинган: “Эртаклар шаҳарчаси”, залнинг чўян эшиклари, карнай чалган созандалар сиймоси, ноёб шиша плафонлар, пештоқ композициялари ва мозаикалар қайта тикланди”, деган Администрация раҳбари.

Эслатиб ўтамиз, жорий йилнинг 30 апрель куни Ўзбекистон Республикаси Президенти Администрацияси раҳбари Саида Мирзиёева Хоразмдан қайтгач, пойтахтдаги қатор маданий масканларнинг шароити билан танишганди.

Администрация раҳбари Тошкентдаги учта театр фаолияти билан танишган, уларнинг биноларини кўздан кечирган.

Мирзиёеванинг сўзларига кўра, театрлар ва музейнинг моддий-техник базасини мустаҳкамлаш, нураб қолган биноларни таъмирлаш ва уларни жиҳозлаш бўйича молиялаштириш масалаларини ҳал қилиш учун масъул шахслар тайинланган.