“Олд Траффорддаги драма”. МЮ ярим финалга йўл олди

18 апрелга ўтар кечаси Европа лигаси чорак финал жавоб ўйинлари бўлиб ўтди. Учрашувлар орасида энг драматик ўтган баҳсда “Манчестер Юнайтед” ўз уйида “Лион”ни қабул қилди ва 5:4 ҳисобида ғалаба қозонди.

Ўйиннинг 10-дақиқасида МЮ футболчиси Угарте ҳисобни очди. Биринчи таймнинг охирида Диого Далот орадаги фарқни иккитага оширди. Иккинчи таймда Толиссо ва Тальяфико гол уриб, ҳисоб 2:2 кўриниш олди. Асосий вақт жанговар дуранг билан тугади. Навбат экстра-таймларга. Қўшимча 15 дақиқаликнинг биринчисида Шерки ва Льяказет гол урди ва меҳмонлар ҳисобда олдинга чиқиб олди. 114-дақиқада Фернандеш, 120-дақиқада Маино ва 120+1 дақиқада Харри Магуайр гол уриб, жамоасининг иродали ғалабасини таъминлади. Якуний ҳисоб 5:4 ва МЮ ярим финалга йўл олди. 

Шу тариқа, икки ўйин натижасига кўра, 7:6 ҳисобида ғалаба қозонган “Манчестер Юнайтед” Европа лигаси ярим финалида “Атлетик Бильбао”га қарши майдонга тушади. Дастлабки ўйин 1 май, жавоб ўйини 8 май куни бўлиб ўтади.