Нигернинг ағдарилган раҳбари АҚШдан ёрдам сўради

Нигернинг ҳокимиятдан четлатилган Президенти Муҳаммад Базум АҚШ ва жаҳон ҳамжамиятига мамлакатда конституциявий тузумни тиклашга ёрдам бериш илтимоси билан мурожаат қилди. Бу ҳақда “The Washington Post” ёзди.

“Мен АҚШ ҳукумати ва бутун халқаро ҳамжамиятни конституциявий тузумни тиклашимизга ёрдам беришга чақираман. Қашшоқлик ва терроризмга қарши курашда мазмунли муваффақиятга эришишнинг ягона йўли умумий қадриятларимиз, жумладан, демократик плюрализм ва қонун устуворлигига ҳурмат учун биргаликда курашишдир”, дейди Базум.

Унинг сўзларига кўра, тўнтариш ташкилотчилари ва уларнинг минтақадаги иттифоқчиларининг очиқ таклифини ҳисобга олса, бутун марказий Саҳел вилояти  “Вагнер” гуруҳи орқали Россия таъсирига тушиши мумкин.

“Африканинг нотинч Саҳел минтақасида Нигер қўшни давлатларимизни эгаллаб олган авторитар ҳаракатлар орасида инсон ҳуқуқларига ҳурмат таянчи ҳисобланади. Бу тўнтариш нигерликлар учун фожиа, аммо унинг муваффақияти бизнинг чегараларимиздан ташқарида ҳам ҳалокатли оқибатларга олиб келади”, дейди Базум.

Унинг қайд этишича, Нигердаги хавфсизлик ҳолати ҳокимиятни қуролли эгаллаш орқали ўрнатилган қўшни Мали ва Буркина-Фасодагига қараганда анча яхши.

Шунингдек, Президент бу мамлакатлар расмийлари хавфсизлик муаммоларига ўз салоҳиятини кучайтириш орқали жавоб бериш ўрнига, “Вагнер” ёрдамига мурожаат қилаётганини гапирган.
Нигер раҳбари ушбу мурожаатни гаровга олинган ҳолда тайёрлаганини айтиб ўтган.

Эслатиб ўтамиз, Нигер президент гвардиясининг бир гуруҳ ҳарбийлари (кейинчалик уларга мамлакат Қуролли кучлари қўмондонлиги ҳам қўшилди) жорий йилнинг 26 июль куни президент Муҳаммад Базумни қўлга олди. Президент гвардияси бошлиғи Абдураҳмон Чиани ўзини янги давлат раҳбари, деб эълон қилди. У тўнтаришни коррупция ва давлат маблағларини ўзлаштиришга қарши курашиш истаги билан изоҳлаган.

Базумнинг ағдарилиши БМТ, АҚШ, Европа Иттифоқи ва Африка Иттифоқи томонидан қораланган. Франция конституциявий тузумни тиклаш ва ҳокимиятдан четлатилган президент Базумни ҳокимиятга қайтаришга қаратилган барча минтақавий ташаббусларни қўллаб-қувватлашини таъкидлаган.