Нефть олиб кетаётган Россия танкери иккига бўлиниб кетди (видео)

Кеча, 15 декабрь  куни Россиянинг нефть танкерларидан бири оғир бўрон вақтида Керч бўғозида иккига бўлиниб кетди ва унинг ичидаги нефть сувга тўкилди. Бошқа бир танкер эса зарар кўриб, ҳалокатга учради. Бу ҳақда “Reuters” нашри хабар берди.

Қайд этилишича, кемалар Россиянинг континентал қисми ва 2014 йилда Украинадан қўшиб олинган Қрим оролининг ўртасидаги Керч бўғозида бўлган, фавқулодда ҳолатни эълон қилган. 

Фавқулодда вазиятлар хизмати биринчи танкернинг ҳалокатида бир киши вафот этгани, яна 12 кишининг эвакуация қилинганини маълум қилган.

“Уларнинг 11 нафари шифохонага олиб келинган, 2 нафари оғир аҳволда”, дейди Соғлиқни сақлаш вазирининг ёрдамчиси Алексей Кузнецов.

Фавқулодда вазиятлар вазирлиги иккинчи кема билан боғланишга уринаётганини билдирди. Тахминларга кўра, кема Таман портига яқин бўлган Керч бўғозининг жанубий қисмидан 80 метр узоқликда қуруқликка чиқиб қолган. Вазирлик кейинчалик “Волгонефть 239” кемасининг экипажини эвакуация қилиш ҳаракатлари ёмон об-ҳаво туфайли тўхтатилганини ёзди. Вазирлик қутқарув гуруҳлари кемага боғланиб, экипажнинг ҳаётини хавф остига қўймайдиган барча зарурий жиҳозлар билан таъминланганини таъкидлади.

Икки танкернинг юклаш қуввати тахминан 4,200 тонна нефть маҳсулотларига тенг. Расмий баёнотларда тўкилган нефть миқдори ёки танкерларнинг нима сабабдан бундай жиддий зарар кўргани ҳақида маълумот берилмаган.

Президент Владимир Путин ҳукуматга қутқарув операциясини олиб бориш ва ёқилғи тўкилишининг таъсирини камайтириш учун ишчи гуруҳ ташкил этишни буюрган. Россия 50 дан ортиқ одам ва жиҳозлар, шу жумладан Мi-8 вертолётлари ва қутқарув кемалари ҳудудга юборилганини маълум қилган.

Маълумот учун, Керч бўғози Россия учун муҳим экспорт йўли ҳисобланади, у орқали Россия дон, нефть, ёқилғи ва сиқилган табиий газ экспорт қилади.

Сентябрда Украина Россия устидан халқаро судга мурожаат қилиб, уни Керч бўғозини якка назорат қилишга уринишида айблаган, аммо Москва бу даъволарни асоссиз деб топган.