“Ньюкасл” илк трансферни амалга оширди

Англиянинг “Ньюкасл” клуби “Атлетико Мадрид” қанот ҳимоячиси Киран Триппьер билан икки йиллик шартнома имзоланди. Бу клубнинг Саудия Арабистони инвесторлари қўл остига ўтганидан кейинги илк трансфери ҳисобланади.

“Ажойиб клуб сафига қўшилганимдан хурсандман. Мадриддаги давр менга ёқди, бироқ авваллари бирга ишлаган мураббий Эдди Хаунинг қизиқишини билганимдан сўнг, фаолиятимни айнан шу ерда давом эттиришга қарор қилдим. Олдимизда машаққатли йўл турганини биламан, лекин Англия Премьер лигасидаги футбол услуби билан жуда яхши танишман. Иқтидорли футболчиларга эга ажойиб клуб сафида майдонга тушиш – катта шараф”, дейди Триппьер.

Аввалроқ, ОАВда “Ньюкасл” футболчи учун тахминан 15 миллион евро ҳамда бонуслар тўлаши ҳақида хабарлар тарқалганди. 31 ёшли англиялик чарм тўп устаси бунга қадар “Манчестер Сити”, “Бёрнли” ва “Тоттенхэм” клублари сафида фаолият юритган. 

Эслатиб ўтамиз, Киран 2019 йилнинг ёзида “Тоттенхэм”дан 22 миллион евро эвазига “Атлетико”га келиб қўшилган эди. “Transfermarkt” порталида унинг трансфер нархи 18 миллион еврога баҳоланмоқда.

Маълумот учун, жорий мавсумда англиялик футболчи Испания чемпионати ва UEFA Чемпионлар лигасида 17 та ўйинда майдонга тушган.