Бир пайтлар АПЛни титратган Деле Алли ҳозир қаерда?

Бир пайтлар Англия футболида энг катта истеъдодлардан бири сифатида эътироф этилган Деле Алли яқинда 30 ёшни қарши олди, аммо унинг карьераси ҳақидаги саволлар ҳали ҳам жавобсиз: у нима учун юқори чўққидан шундай тез тушиб кетди ва у яна қайта оладими?

Деле Алли – бу ном бир вақтлар Англия футболининг келажаги сифатида тилга олинар эди. У “Тоттенҳэм” сафида ўйнаган даврда Премьер-лиганинг энг хавфли ярим ҳимоячиларидан бирига айланган.

Болалик ва оғир ҳаёт босқичи

Деле Алли Англиянинг Милтон Кейнс шаҳрида нигериялик отаси Кехинде ва инглиз онаси Дениз оиласида туғилган. Унинг отаси у туғилганидан бир ҳафта ўтиб АҚШга кўчиб кетган. Шу сабабли Деле асосан онаси қўлида тарбияланган. Унинг болалиги осон кечмаган. Манбаларга кўра, онасида спиртли ичимликлар билан боғлиқ муаммолар бўлган ва бу оилавий ҳаётга таъсир қилган. Тўққиз ёшида у отаси билан бирга Нигерияга кўчиб ўтади ва у ерда икки йил давомида халқаро мактабда таҳсил олади. Кейин эса яна Англияга қайтиб, Милтон Кейнсда онаси билан яшашда давом этади. 13 ёшида Деле Алли Милтон Кейнс Донс академиясида ўйнаган бир футболчининг оиласи – Алан ва Салли Хикфордлар хонадонига кўчиб ўтади. У уларни ўзининг оиласи сифатида қабул қилган, гарчи расман фарзандликка олинмаган бўлса ҳам. 2023 йил июль ойида Гари Невиллнинг “The Overlap” подкастидаги интервьюсида Алли болалигида, олти ёшида жинсий зўравонликка учраганини очиқ айтган. Шунингдек, у саккиз ёшида ноқонуний муҳитга тушиб қолиб, гиёҳванд моддалар савдосига аралашганини ҳам маълум қилган. У шу билан бирга “Бешиктош”даги ижарадан кейин уйқу дориларига қарамлик ва руҳий соғлиқ билан боғлиқ муаммолар сабабли олти ҳафта давомида реабилитация марказида даволанганини ҳам таъкидлаган.

“Милтон Кейнс Донс”дан “Тоттенҳэм”гача

Алли профессионал карьерасини “Милтон Кейнс Донс” клубида бошлади. У жуда ёш бўлишига қарамасдан асосий таркибга кириб, тезда ўзини кўрсата бошлаган. 2015 йилда бошида уни “Тоттенҳэм” сотиб олади аммо ўша мавсум сўнгигача у “Милтон Кейнс Донс”да ижарада қолади. “Шпорлар” сафига эса ўша йили ёзда келиб қўшилади. Бу ерда унинг карьераси чинакам порлади. Алли гол уриш, ҳужумни якунлаш ва жарима майдонида тўғри қарор қабул қилиш қобилияти билан Премьер-лиганинг энг ёрқин ёш юлдузларидан бирига айланди.

Деле Аллининг “Тоттенҳэм”даги фаолияти

Деле Алли Премьер-лигада “Тоттенҳэм” сафида дебютини 2015 йил 8 август куни “Манчестер Юнайтед”га қарши ўйинда ўтказди. У тез орада ўзини кўрсатиб, 22 август куни “Лестер Сити”га қарши ўйинда илк голини урди. Шундан кейин у асосий таркибда мустаҳкам ўрин эгаллай бошлади ва “Сандерленд” ҳамда “Астон Вилла”га қарши ўйинларда ҳам гол урди. 2015 йил ноябрида Шимолий Лондон дербисидаги ажойиб ўйини учун учрашувнинг энг яхши футболчиси деб топилди. Илк мавсумдаги барқарор ўйини сабаб у тезда жамоанинг асосий футболчисига айланди ва 2016 йил бошида клуб билан 2021 йилгача бўлган шартнома имзолади. Шу йилнинг ўзида у АПЛ томонидан энг яхши ёш футболчилар қаторига кирди ва мавсум якунида “Йилнинг энг яхши ёш футболчиси” деб эътироф этилди.

Юксалиш даври

Кейинги мавсумда у футболкасидаги исмини “Алли”дан “Деле”га ўзгартирди. Бунинг сабабини ўз онаси билан алоқаларини бутунлай узганлик билан изоҳлади. 2016/17 мавсум декабрь-январь ойларида 6 ўйинда 8 гол киритиб Премьер-лиганинг январь ойидаги энг яхши футболчиси совринини қўлга киритди. Шунингдек, у яна бир бор АПЛ томонидан йилнинг энг яхши ёш футболчиси деб топилди. Терма жамоа ва Чемпионлар лигасидаги муваффақиятлар Делле Алли Англия терма жамоаси сафида ҳам маълум вақт муҳим ўрин эгаллади. У Европа чемпионати ва Жаҳон чемпионати каби йирик мусобақаларда иштирок этиб, гол ва ассист қайд этди. У 2019 йилги Европа Чемпионлар лигаси финалида “Тоттенҳэм” жамоаси билан бирга тарих ёзиш имкониятига ҳам эга эди, бироқ Клопп қаторасига иккинчи йил финални бой бергиси келмади. Айнан шу даврдан кейин унинг карьерасида пасайиш бошланди.

“Эвертон”даги қайта тикланишга уриниш

“Тоттенҳэм”даги етти йиллик фаолиятдан кейин Деле Алли 2022 йил январь ойида Англиянинг “Эвертон” клубига ўтди. Унинг бу трансфери карьерасини қайта тиклаш учун катта имконият сифатида кўрилган эди. Бироқ “Эвертон”даги даври ҳам муваффақиятли кечмади. У жамоада барқарор ўйнай олмади, асосий таркибда кам майдонга тушди ва ўзининг аввалги формасига қайта олмади.

“Бешиктош”даги ижара

2022/23 мавсумда у Туркиянинг “Бешиктош” клубига ижара асосида ўтди. Бу ерда унга яна ўйин амалиёти ва янги бошланиш имконияти берилди. Бироқ “Бешиктош”да ҳам вазият кутилгандек бўлмади. У бир неча ўйинларда майдонга тушди, лекин жароҳатлар ва ўйин амалиёти етишмаслиги сабабли тўлиқ тикланишга эриша олмади ва яна Англияга қайтди.

“Комо”даги сўнгги уриниш

Деле кейинчалик Италияга йўл олди ва “Комо” жамоасига қўшилди. Бу қарор унинг карьерасини қайта тиклаш учун янги имконият сифатида кўрилган эди. Бироқ у ерда ҳам барқарорлик топа олмади. У фақат бир ўйинда майдонга тушиб, қизил карточка олгани ҳақида маълумотлар бор. Шу билан унинг Италиядаги карьераси ҳам қисқа давом этди. Ҳозирда футболчи янги чақирқлар кутмоқда, аммо унинг беқарор ўйинлари сабаб кўпгина жамоалар ўз таркибида кўришни истамаяпти. Шу билан бирга, Деле Алли ҳали 30 ёшда, бугун бу ёш футболда ўрта ёшга айланиб қолди. Балки у яна тикланиб, 5-6 йил юқори формада ўйнаб бериши ҳам мумкин. Қолганини вақт кўрсатади.

Рамазон Усанов