АПЛнинг энг омадсиз саккиз мураббийи

Премьер-лига жамоаларига мураббийлик қилиш анчайин қийин иш ва бу катта босимни ҳам талаб қилади. Негаки, бу лигада умуман навбатчи ўйинлар бўлмайди, ҳар бир ўйинда жамоа борини бериши керак. Бу чемпионатда ҳамма нарса содир бўлиши мумкин: баъзи мураббийлар дебют мавсумидаёқ жамоасини чемпион қилади, баъзилари эса бир мавсум олдин лигада қолишга қурашган жамоа билан кейинги мавсум ғолиб ҳам бўлаверади.

Қуйидаги рўйхатда Премьер-лига тарихидаги энг омадсиз мураббийлар келтирилган. Рейтингда фақат уларнинг майдондаги натижаси эмас, балки клуб ва мухлислардан қўйилган катта кутилмаларни ҳам ҳисобга олинган. Улардан 8 нафари турли вазиятларда келиб, умидларни оқлай олмаган ва Премьер-лига тарихидадан “омадсиз мураббий” сифатида жой топган.

8. Реми Гард (“Астон Вилла”, 2015-2016)

“Астон Вилла”нинг пасайиши ва 2016 йилда Премьер-лигадан тушиб кетиши аслида Тим Шервуд давридан бошланган бўлса-да, Реми Гарддан умид катта эди. У келган пайтда жамоада Жек Грилиш, Идрисса Гейе, Жордан Верету ва Жордан Амави каби кейинчалик топ жамоаларга трансфер қилинган футболчилар бор эди. Аммо умумий савия етишмади.

Гард илк ўйинида “Манчестер Сити”га қарши 0:0 ўйнаб, яхши таассурот қолдирди. Лекин кейинги 20 ўйинда атиги 2 та ғалаба қозона олди. Қизиғи, бу ғалабаларда ҳам рақиблар ўз дарвозасига гол урган. Оқибатда у кутилмаларни оқлай олмади ва истеъфога чиқди. Чемпионат тугашига 7 тур қолганда келган Эрик Блек ҳам вазиятни ўнглай олмади. Охир-оқибатда эса “Астон Вилла” ўша мавсум 17 очко жамғариб, Прьемер-лигада энг сўнги ўринни эгаллади ва Чемпионшипга равона бўлди. 

7. Дэвид Мойес (“Манчестер Юнайтед”, 2013–2014)

Дэвид Мойесни бу рўйхатга киритиш баҳсли, аммо унинг “Манчестер Юнайтед”даги 8 ойлик даври ҳақиқатан ҳам омадсиз кечган. У Сэр Алекс Фергюсондан кейин келиб, жуда катта босим остида иш бошлади. Клуб бошқа йирик мураббийларни ҳам кўриб чиққан эди, шунинг учун кутилмалар юқори бўлган. Фергюсон даврида жамоа ҳар қандай ҳолатда ҳам ғалаба қозонишга интиладиган руҳга эга эди. Мойес даврида эса бу руҳ йўқолди ва натижалар кескин пасайди. Шу тариқа 2013-2014 йилги мавсумни жамоа 7-ўринда якунлади. Ҳозирда бу давр “Юнайтед”даги муваффақиятсизликлар занжирининг бошланиши деб эсланади.

6. Рой Хожсон (“Уотфорд”, 2022)

Рой Хожсон қийин вазиятдаги жамоаларни қутқариш билан тажрибали мураббий сифатида танилган. “Уотфорд” ҳам 2022 йилда уни айнан шу мақсадда таклиф қилди. Аммо амалда бу қарор ўзини оқламади. У жамоани бирлаштира олмади, ҳатто мухлислар билан муносабат ҳам ёмонлашди. Энг ёмони – у “Уотфорд”да бирорта ҳам уй ўйинида ғалаба қозона олмади. Оқибатда жамоа мавсум сўнгида 23 очко билан турнир жадвалида 19-ўринни эгаллади ва қуйи лигага равона бўлди. Шундан сўнг жамоа Чемпионшипнинг ўртамиёна клубига айланиб қолди.

5. Пол Жуелл (“Дерби Каунти”, 2007-2008)

Пол Жуелл илгари яхши натижаларга эришган мураббий бўлган. Лекин “Дерби Каунти”да у бутунлай омадсизликка учради. Жамоа у келган пайтда ҳам ёмон ҳолатда эди, аммо Жуелл вазиятни яхшилай олмади. У бошқарган даврда жамоа бирорта ҳам ғалаба қозона олмади ва Премьер-лига тарихидаги энг кам – 11 очко билан қуйи лигага тушиб кетди. Бу Жуеллнинг фаолиятидаги энг катта муваффақиятсизлик бўлиб қолди. Шу-шу, бир пайтлар Чемпионлар лигасида “Реал”ни 4:1 ҳисобида таслим қилган “Дерби Каунти” орадан 18 йил ўтибдики қайтиб Премьер-лига юзини кўрмади.

4. Натан Жоунс (“Саутгэмптон”, 2022-2023)

Натан Жоунс натижалардан кўра кўпроқ ўз баёнотлари билан эсда қолган мураббий бўлди. Унинг гаплари кўпинча баҳсли ва тушунарсиз эди. Масалан, у ҳатто 10 кишилик рақибга қарши устунликни бой беришни “ортиқча ўйинчи босими” дея изоҳлаган. Аммо майдондаги натижалар жуда ёмон бўлди – 8 ўйинда атиги 1 та ғалаба. 24-турдан унинг ўрнига келган Рубен Селлес дастлабки ўйинида “Челси”ни мағлуб этганига қарамай, кейинчалик унинг ҳам ишлари юришмади ва “Саутгэмптон” жадвалнинг охирига тушиб кетиб, мавсум сўнгида Премьер-лигадан “қувилди”.

3. Алан Ширер (“Ньюкасл”, 2009)

Алан Ширер “Ньюкасл” афсонаси бўлишига қарамай, мураббий сифатида омадсизликка учради. У жуда оғир вазиятда жамоа вақтинча мураббий сифатида бошқарувига келди ва жонажон клубини қутқаришга ҳаракат қилди. Аммо у 8 та ўйиндан фақат 1 тасида ғалаба қозона олди. Оқибатда “Ньюкасл” мавсум охирида қуйи лигага тушиб кетди.

2. Феликс Магат (“Фулҳэм”, 2013-2014)

“Бавария” “Вольфсбург” ва “Шальке” каби жамоаларни бошқарган тажрибали немис мутахассиси 2014 йил февралида “Фулҳэм”ни қабул қилиб олди. Рейтингдаги қолган мурабиййларга қараганда Феликс Магат яхшироқ натижа қайд этди, аммо унинг Премьер-лигадаги 11 ўйинда қўлга киритган 12 очкоси, жамоани элитада олиб қола олмади ва мураббий ишдан бўшатилди. Шунингдек, унинг истеъфосига жамоа футболчилари билан ёмон муносабати ҳам сабаб бўлгани айтилди.

1. Франк де Бур (“Кристал Пэлас”, 2017)

Франк де Бур Премьер-лига тарихидаги энг омадсиз мураббийлардан бири сифатида қолган. У 2017 йилда “Кристал Пэлас”га келиб жамоада янги услуб жорий қилмоқчи бўлди, аммо унинг услуби умуман ишламади. Жамоа унинг қўл остида барча 4 ўйинда ҳам мағлуб бўлди ва ҳатто бирорта ҳам гол ура олмади. Оқибатда у жуда қисқа вақт ичида ишдан бўшатилди ва Премьер-лига тарихидаги энг омадсиз мураббийлардан бирига айланди.

Рамазон Усанов