Моуриньонинг “Реал”га қайтиши деярли аниқ бўлди

Португалиялик мутахассис Жозе Моуриньонинг “Реал Мадрид”га бош мураббий бўлиш эҳтимоли жуда юқори баҳоланмоқда. Бу ҳақда “Marca” нашри хабар берди.

Манбада айтилишича, Моуриньо ушбу лавозим учун асосий ва ягона номзод ҳисобланади. Хабарга кўра, томонлар келишувга жуда яқин ва машҳур инсайдер Фабрицио Романонинг ибораси билан айтганда, “Here we go” эълон қилиниши ҳам узоқ эмас. Жозе “қироллик клуби”дан сўнг мураббийлик фаолиятини якунламоқчи. Шундай қилиб, португалиялик мутахассис Мадрид клубини тарк этганидан 13 йил ўтиб яна жамоа бошқарувига жуда яқин турибди.

63 ёшли Моуриньо “Реал Мадрид”ни 2010 йилдан 2013 йилгача ҳам бошқарган. Унинг қўл остида клуб Испания чемпионлиги, шунингдек, Испания кубоги ва Суперкубогини қўлга киритган.

Маълумот учун, “Реал Мадрид” жорий мавсум якунига қадар яна иккита учрашув ўтказади. Биринчиси, жорий йилнинг 17 май куни “Севилья”га қарши учрашуви, иккинчиси эса 23 май куни “Атлетик Бильбао” билан баҳс олиб боради.