Мигрантлар рус анъаналарини ҳурмат қилиши керак – Путин

Россия Федерацияси Президенти Владимир Путин мамлакатдаги меҳнат муҳожирлари давлат иқтисодиёти манфаатларига риоя қилиши, Россия маданияти, урф-одатлари ва қонунларини ҳурмат қилиши кераклигини айтди. Унинг сўзлари Кремль сайтида келтирилмоқда.

“Биринчи навбатда, биз Россия иқтисодиёти манфаатларига жавоб берадиган шундай меҳнат ресурсларини жалб қилишимиз керак. Демак, бу одамлар лингвистик, этномаданий нуқтайи назардан тайёр бўлиши, урф-одатларимизни, қонунларимизни билиши, бу қонунларни ҳурмат қилиши керак. Биз эса МДҲ ва Марказий Осиё мамлакатларидаги ҳамкасбларимиз билан биргаликда бу борада ҳамкорликда ишлаяпмиз”, дейди Путин Фуқаролик жамиятини ривожлантириш ва инсон ҳуқуқлари бўйича кенгаш йиғилишида.

Унинг сўзларига кўра, Россия Федерацияси ушбу мамлакатларда рус тилида ўқитиладиган мактаблар очмоқда ва тадбирлар ўтказмоқда.

“Аммо бу барча келганлар, яна такрор айтаман, Россия қонунларига риоя қилишлари, маданий анъаналаримизни, халқларимизнинг анъаналарини ҳурмат қилишлари кераклигини истисно этмайди. Лекин, албатта, биз маданиятли давлат сифатида уларнинг ҳуқуқларини ҳам таъминлашимиз керак”, дейди Путин.

Унинг таъкидлашича, мигрантлар ҳуқуқлари масаласи жуда кескин.

“Бу ерда мен этник-маданий мувозанатни сақлаш керак деган фикрга қўшила олмайман. Албатта, бу соҳада содир бўлаётган ҳамма нарса, энг аввало, иқтисодиёт манфаати ва ишчилар етишмаслиги билан боғлиқ. Лекин, албатта, бу одамларни тайёрлаш керак”, дейди Президент.

Шу билан бирга, у, биринчи навбатда, барча соҳаларда Россия Федерацияси фуқароларининг манфаатларини биринчи ўринга қўйиш зарурлигини таъкидлаган.

Эслатиб ўтамиз, ўтган ойда Ўзбекистон Республикаси Президенти Администрацияси Ёшлар сиёсати департаментининг раҳбари Қаҳрамон Қуронбоев Москвага бориб, Россия Давлат Думаси вице-спикери Владислав Даванков билан учрашувда Россия ҳукуматидан ўзбек диаспораси ҳисобидан мамлакатда меҳнат муҳожирларининг фарзандлари учун хусусий боғча ва мактаблар очишда ёрдам сўраганди. Шундан сўнг, Россиялик депутат Михаил Делягин мазкур ташаббус мамлакат қонунларига мос келмаслигини айтиб, Ўзбекистон Россиядан фуқароларини олиб кетиши кераклигини иддао қилганди. 

Бунга жавобан депутатнинг Ўзбекистондаги мавқедошлари, жумладан, “Миллий тикланиш” демократик партияси Марказий кенгаши раиси Алишер Қодиров Россияда ўзбеклар ва ўзбек тилига муносабат “Делягинча” бўлса, Ўзбекистонда ҳам рус тилига муносабат буткул ўзгариши кераклигини айтган,  “Юксалиш” умуммиллий ҳаракати раиси, Олий Мажлис депутати Бобур Бекмуродов эса ўзбекистонликлар ҳалол меҳнатлари эвазига ўз оилаларини моддий таъминлаётганини, Россия уларни текинга боқмаётганини эслатган эди.