Меркель Гутерришнинг таклифини рад этди
Олам
−
19 Январь 2022 5707
Германия собиқ канцлери Ангела Меркель (2005-2021) БМТ Бош котиби Антониу Гутерришнинг ташкилот тузилмаси бўйича юқори даражали маслаҳатчи бўлиш таклифини рад этди. Бу ҳақда бугун, 19 январь куни DPA агентлиги собиқ ҳукумат раҳбари бюросига таяниб, хабар берди.
Меркель “бош котиб билан шу мавзуда телефон орқали суҳбатлашди, унга миннатдорлик билдирди, аммо таклифни қабул қилмаслигини айтди”, деб таъкидлади собиқ канцлер идораси.
Аввалроқ, Антониу Гутерриш Ангела Меркелга глобал жамоат моллари бўйича юқори даражадаги маслаҳат органига раислик қилиш таклифини билдирганди.
Меркель 16 йил давомида канцлер лавозимида ишлаган. 2018 йилда у бешинчи муддатга номзодини қўймаслигини эълон қилди. 2021 йил декабрида у Германия ҳукумати раҳбарлигидан расман кетди.
Собиқ канцлер истеъфога чиққанидан кейин сиёсий лавозимларда ишламоқчи эмаслигини бир неча бор айтганди.
