Малика Диананинг укаси унинг ўлими ҳақидаги “ҳақиқат”ни очади

Буюк Британиянинг марҳум маликаси Диана Спенсернинг укаси Чарльз Спенсер опасининг ҳаёти, шаҳзода Чарльз билан никоҳи ва Париждаги ҳалокатидан кейинги воқеалар ҳақида китоб ёзди. У асарда вақт ўтиши билан “ҳақиқат” сифатида қабул қилинган айрим маълумотларга ўз нуқтаи назаридан келиб чиқиб жавоб беради. Бу ҳақда “Reuters” хабар берди.

Спенсернинг айтишича, Диана вафотининг 30 йиллиги яқинлашгани сабабли у опаси ҳақида интервью бериш бўйича яна кўплаб сўровлар олган.

“Бу мени бошқаларнинг фикрларини яна ўқиш ноқулайлигидан кўра, ўз фикрларим ва хотираларимни бир марта ва бутунлай ёзиб қолдиришга ишонтирди. Чунки уларнинг кўпчилиги вақт ўтиши билан ҳақиқат сифатида қабул қилинган ёлғонларга асосланган”, деган Спенсер.

Унинг таъкидлашича, китобдан кўзланган асосий мақсад – Диана ҳақидаги ҳақиқатни унинг укаси нуқтаи назаридан айтиб бериш.

Қайд этилишича, Чарльз Спенсернинг “Swan Song: Diana, My Sister” (“Оққуш қўшиғи: Диана, менинг опам”) деб номланган китоби жорий йилнинг 22 сентябрь куни Буюк Британияда нашр этилади. Асар 12 тилга таржима қилиниши режалаштирилган.

Маълумот учун, Диана Спенсер 1961 йил 1 июль куни Англиянинг Норфолк графлигидаги Сандрингем қироллик мулкида жойлашган Park House қароргоҳида туғилган. У 1981 йилда ўша пайтдаги Уэльс шаҳзодаси, ҳозирги қирол Чарльз III га турмушга чиққан. Шундан сўнг, у дунёдаги энг кўп суратга олинган аёллардан бирига айланган. Бироқ уларнинг никоҳи бузилиб, 1996 йилда ажрашиш билан якунланган.

Диана 1997 йилнинг августида 36 ёшида севгилиси Доди ал-Файед билан автомобилда кетаётганганида Париж кўчаларида ҳалокатга учраган. Бунинг оқибатида малика вафот этган. Диананинг укаси Чарльз Спенсер эса унинг дафн маросимида қироллик оиласини танқид қилган машҳур нутқи билан одамларнинг ёдида қолган.