Мальта Фаластинни давлат сифатида тан олади

Мальта Бош вазири Роберт Абела Бирлашган Миллатлар Ташкилоти Бош Ассамблеясининг сентябрь ойидаги йиғилишида Фаластинни давлат сифатида расман тан олишини билдирди. Бу ҳақда у кеча, 29 июль куни ўзининг Facebook саҳифасида эълон қилди.

“Бизнинг позициямиз Яқин Шарқдаги узоқ муддатли тинчлик ҳаракатларига содиқлигимизни акс эттиради”, деб ёзди Роберт Абела.

“Reuters”га кўра, Мальта ҳукумати ички босим остида қолмоқда. Жорий йилнинг июль ойи ўрталарида ўнг марказчи мухолифат Фаластинни тан олиш бўйича “дарҳол чоралар кўришга” чақиргач, бу босим кучайган.

Европа Иттифоқига аъзо бўлган Ўртаер денгизи орол давлати узоқ йиллардан бери фаластинликларни қўллаб-қувватлаш анъаналарига эга бўлиб, икки мустақил давлат ечимини топишга интилиб келган.

Роберт Абела май ойида ҳам Фаластинни тан олиш режаси борлигини айтган. Ўшанда бу эълон июнь ойига мўлжалланган БМТ конференциясида бўлиши керак эди, бироқ тадбир кейинга сурилган.

Эслатиб ўтамиз, аввалроқ Франция Президенти Эммануэль Макрон ҳам сентябрь ойида БМТда Фаластинни тан олишини эълон қилганди ва Франциянинг “Яқин Шарқда адолатли ва барқарор тинчлик”ка бўлган тарихий садоқатини таъкидлаганди.

Кеча, 29 июль куни эса Буюк Британия Бош вазири Кир Стармер агар Исроил Ғазо секторидаги урушда ўт очишни тўхтатиш каби қатор мажбуриятларни зиммасига олмаса, БМТда сентябрь ойида Фаластинни тан олишини билдирди.