Макроннинг хотини эркак эмаслиги исботланди 

Париж жиноий суди Франциянинг биринчи хоними Брижит Макронни интернет орқали таъқиб қилиш, ҳақоратлаш ва у ҳақда ёлғон маълумотлар тарқатиш билан боғлиқ иш бўйича ҳукм чиқарди. Суд қарорига кўра, ўн нафар шахс Президент рафиқасига нисбатан кибербезорилик қилганликда айбдор деб топилди. Бу ҳақда бугун, 5 январь куни BFM хабар берди.

Тергов материалларига кўра, судланувчилар ижтимоий тармоқларда Брижит Макрон гўёки эркак бўлиб туғилгани ва трансгендер аёл экани ҳақидаги фитна назариясини фаол равишда тарқатган.

Шунингдек, улар Франция Президенти Эммануэль Макрон ва унинг рафиқаси ўртасидаги 24 йиллик ёш фарқини омма олдида масхара қилган, ҳақоратли ва камситувчи иборалар ишлатган.

Суд раиси Терри Доннарнинг таъкидлашича, айбланувчилар жабрланувчига нисбатан “қасддан зарар етказиш нияти” билан, “ёвузона, таҳқирловчи ва ҳақоратли” сўзлар орқали ёлғон ахборот тарқатган. Оқибатда ушбу миш-мишлар қисқа вақт ичида бутун дунёга ёйилган.

Суд қарорига биноан, саккиз нафар судланувчи тўрт ойдан саккиз ойгача шартли қамоқ жазосига ҳукм қилинган. Суд мажлисида қатнашмаган айбланувчилардан бирига эса олти ойлик қамоқ жазоси тайинланган.

Маҳкумлар орасида машҳур реклама агентлиги раҳбари Орелиэн Пуассон (Zоé Sagan тахаллуси билан танилган) саккиз ойлик шартли қамоқ жазосига ҳукм қилинган. У, шунингдек, рақамли маконда инсонларни ҳурмат қилиш бўйича махсус курсни ўташи шарт. Унинг ижтимоий тармоқлардаги аккаунти ҳам тўхтатилди. Фолбин Амандин Руа эса худди шундай қўшимча чоралар билан олти ойлик шартли қамоқ жазосига ҳукм этилган. Прокуратура уларни Брижит Макронга қарши дезинформация кампаниясининг асосий ташаббускорлари сифатида баҳолаган.

Суд жараёнида Брижит Макроннинг қизи Типҳен Озер ҳам сўзга чиқиб, онасига нисбатан кучайиб бораётган нафрат ва босимни қоралаган. Унинг айтишича, ушбу ёлғон ахборотлар Брижит Макроннинг шахсий ҳаёти ва соғлиғига жиддий салбий таъсир кўрсатган.

“Бу тўхтовсиз давом этаётган хабарлар гирдоби онамнинг соғлиғини ёмонлаштирди”, деган Типҳен Озер.

Айни пайтда АҚШ судида ҳам Франция биринчи хонимининг трансгендерлиги ҳақидаги миш-мишларни фаол тарқатиб келаётган ўта ўнг қанот фаоли Кендис Оуэнсга қарши шунга ўхшаш даъво кўриб чиқилмоқда. Мазкур даъво Эммануэль Макрон томонидан қўзғатилган.