Макроннинг ашаддий танқидчиси ўлик ҳолда топилди

Франциянинг қуйи палатаси – Миллий Ассамблея депутати, ўнг қанотдаги “Республикачилар” партиясидан сайланган депутат Оливье Марлекс ўлик ҳолда топилди. Бу ҳақда прокурор Фредерик Шевальега таяниб, “France 24” хабар берди.  

Депутатнинг жасади унинг сайлов округи бўлмиш Анэт коммунасида топилган. Дастлабки маълумотларга кўра, парламент аъзоси ўз жонига қасд қилган.

Марлекс 54 ёшда бўлган, у собиқ бош вазир Мишель Барнье билан яқин сиёсий ҳамкорлик қилган. Жасад депутат яшаган уйда жандармалар томонидан топилган. AFP хабарига кўра, ҳуқуқ-тартибот идораларига мурожаат қилган шахс коммунанинг мэри бўлган.

“Республикачилар” партияси Марлекснинг ўлимини тасдиқлаган. Франция Президенти Эммануэль Макрон Х ижтимоий тармоғидаги постида уни “тажрибали сиёсатчи” деб атаб, “ўз ғояларини қатъий ҳимоя қилган инсон” сифатида таърифлаган.

“Бизнинг келишмовчиликларимиз ҳам ҳурматга сазовор эди, чунки улар мамлакатимизга бўлган муҳаббатимиз асосида баҳоланарди”, деб ёзди Макрон.

Ницца мэри Кристиан Эстрози ва “Миллий бирлашув” партияси парламент фракцияси етакчиси Марин Ле Пен ҳам таъзия билдирган.

Марлекснинг ўлими муносабати билан Франция Миллий Ассамблеяси 7 июль куни кечқурун ўз йиғилишини қисқа муддатга тўхтатган ва бир дақиқа сукут сақлаган.

Қайд этилишича, у илк бор 2012 йилда парламентга сайланган. Унгача, 2007-2012 йиллар давомида Президент Николя Саркози даврида унинг маслаҳатчиси бўлган.

Марлекс Президент Макрон сиёсатининг фаол танқидчиси эди. У Alstom Франция энергетика компаниясининг Американинг General Electric концернига сотилиши билан боғлиқ шартнома тафсилотларини ўрганиш учун ташкил этилган парламент комиссиясига раҳбарлик қилган. Депутат ушбу битимдан олинган маблағларнинг бир қисми 2017 йилда Макроннинг Президентлик кампаниясини молиялашда ишлатилган бўлиши мумкинлигини тахмин қилган.