Лукашенко ҳокимиятда “бироз кўпроқ қолганини” тан олди

Беларусь ҳукмдори Александр Лукашенко республикада ҳокимиятга “янги авлод” келаётгани ва у ҳокимиятда “бироз ушланиб қолганини” айтди. Бу ҳақда у Минскдаги Халқаро кўргазма марказида сўз очди.

Маълум қилинишича, давлат раҳбари ушбу ушланиб қолишни тажрибали сиёсатчиларни тайёрлаш муҳимлиги билан изоҳлаган.

“Мен сизга ваъда берганимдек, амалда янги авлод ҳокимиятга олиб келинди. Хўш, мен бироз ушланиб қолдим, лекин сабр қилинг, тажрибали одамлар ҳам бўлиши керак. Бизда улар бор. Ёшлар келди. Мана, ёшларимиз нималарга қодир эканини кўрасиз ва хулоса қиласиз. Хўш, ёшлар қалай?” деган Лукашенко.

Лукашенко, шунингдек, “ёшлар нималарга қодир?” деган саволга жавоб топиш кераклигини таъкидлаган. У, қолаверса, фуқароларни иш жойларида ўз вазифаларини профессионал даражада бажаришга чақирган.

“Сиздан бошқа ҳеч нарса талаб қилмайман. Қолган ҳамма нарсани биз ҳал қиламиз – ҳар ким ўз жойида. Мен раҳбар сифатида ўз муаммоларим билан шуғулланаман. Ҳукумат – иқтисодиёт, маъмурият, дипломатия ва бошқалар. Ҳаммаси жойида, бу машина бузилишларсиз ишлаши керак”, деган Лукашенко.

Маълумот учун, Александр Лукашенко 1994 йилдан буён ҳокимият тепасида. 2025 йил январь ойида у еттинчи муддатга сайланди.

2020 йилги президентлик сайловларидан сўнг Беларусда бир неча ой давомида президент истеъфосини талаб қилиб оммавий норозилик намойишлари бўлиб ўтди. Беларусь ҳуқуқни ҳимоя қилиш ташкилотлари маълумотларига кўра, 35 минг намойишчи ҳибсга олинган. Лукашенконинг фикрича, агар у кетса, мамлакатдаги вазият “Украинадагидан ҳам ёмонроқ бўларди”.

Эслатиб ўтамиз, аввалроқ Александр Лукашенко Мустақиллик саройидаги инаугурация маросимида дунёнинг ярми Беларусдаги диктатурани орзу қилиши ҳақида гапирган эди. Лукашенконинг таъкидлашича, мамлакатда сўз эркинлиги билан ҳаммаси жойида.