Лукашенко еттинчи марта қасамёд қилди

Бугун, 25 март куни Минск шаҳридаги Мустақиллик саройида Беларусь резиденти Александр Лукашенконинг инаугурация маросими бўлиб ўтди. Бу ҳақда БелТА хабар берди.

Лукашенко мамлакат раҳбари сифатида қасамёд қилган. Унга фаолият юритиш учун расмий гувоҳнома топширилган. Маросимга 1100 дан ортиқ меҳмон таклиф этилган.

Инаугурация бошланишидан олдин Лукашенко мотоциклчилар кортежи билан Минскнинг иккита марказий проспекти бўйлаб кириб келган.

Беларусь Конституциясига кўра, давлат раҳбари қасамёди Бутунбеларусь халқ мажлиси президиуми аъзолари, Вакиллар палатаси депутатлари ва Республика кенгаши аъзолари, Конституциявий ва Олий суд судьялари иштирокида президент сайланган кундан бошлаб икки ойдан кечиктирмай тантанали вазиятда қабул қилинади.

Маълумот учун, 1994 йилдан бери Беларуснинг олий давлат лавозимини эгаллаб келаётган Лукашенко учун навбатдаги муддати еттинчиси саналади.

Эслатиб ўтамиз, жорий йилнинг 3 февраль куни Беларусь Марказий сайлов комиссияси президентлик сайловларининг якуний натижаларини эълон қилганди. Унга кўра, республиканинг амалдаги раҳбари Лукашенко 86,82 фоиз натижа билан ғалаба қозонган. Марказий сайлов комиссияси маълумотларига кўра, 26 январь куни бўлиб ўтган президентлик сайловида иштирок этганлар умумий сайловчиларнинг 85,69 фоизини ташкил этган.