Левандовскийнинг янги жамоасининг номи аниқ бўлди

Польша терма жамоаси ҳужумчиси Роберт Левандовский АҚШнинг MLS чемпионатида иштирок этувчи “Чикаго Файр” клуби билан келишувга эришди. Бу ҳақда журналист Фабрицио Романо маълум қилди.

Маълум қилинишича, томонлар ўртасидаги келишув келаси ҳафта бошида расман якунланиши кутилмоқда. Икки ҳафта аввал Левандовский клуб раҳбарияти билан музокара ўтказиш учун Чикагодаги бош қароргоҳига ташриф буюрган эди.

Аввалроқ, Левандовский 2025-2026 йилги мавсум якунланганидан кейин “Барселона”ни тарк этишини маълум қилди. Унинг каталонияликлар билан тузган шартномаси жорий йилнинг 30 июнь куни якунига етади.

Левандовский 2022 йилнинг ёзида “Барселона” сафига қўшилган. Шу вақт мобайнида у жамоа билан уч марта Испания чемпионлигини, 3 та Испания Суперкубогини ҳамда бир марта Испания Кубогини қўлга киритди.

Маълумот учун, 37 ёшли ҳужумчи фаолияти давомида 2010-2014 йилларда Дортмунднинг “Боруссия”си, 2014-2022 йилларда эса Мюнхеннинг “Бавария”си шарафини ҳимоя қилган. У “Бавария” сафида саккиз марта Германия чемпиони бўлиб, 3 та Германия Кубоги, шунингдек, UEFA Чемпионлар лигаси ва UEFA Суперкубогини қўлга киритган.

Роберт Левандовски Польша миллий терма жамоаси сафида 165 та учрашувда майдонга тушиб, 89 та гол урган. Бу натижа уни мамлакат терма жамоаси тарихидаги энг яхши тўпурарга айлантирган.