“Ланс” Ҳусановни қандай кашф этгани маълум бўлди

“Манчестер Сити” ва Ўзбекистон миллий терма жамоаси ҳимоячиси Абдуқодир Ҳусановнинг агенти Ғайрат Ҳасбиуллин футболчининг фаолияти қандай ривожлангани ва унга қайси Россия клублари қизиқиш билдиргани ҳақида гапирди. Бу ҳақда Ҳасбиуллин “Sport-express” нашрига берган интервьюсида сўз очди.

Ҳасбиуллиннинг айтишича, Франциянинг “Ланс” клуби Ҳусановни 2023 йилда Аргентинада бўлиб ўтган U-20 Жаҳон чемпионатида кузатиб борган.

“Ланс” скаути Аргентина марказий ҳимоячисини кузатиш учун турнирга келганди. Биринчи ўйин бизга қарши эди ва унга Абдуқодирнинг ўйини ёқди. У клубнинг бош скаутига қўнғироқ қилиб: “Мени Ўзбекистоннинг иккинчи ўйинига ҳам қолдиринг, бу ердаги бола менга жуда ёқди”, дейди. Кейин у иккинчи учрашувни ҳам томоша қилди, икки ўйин бўйича ҳисобот тайёрлаб, уни бош мураббийга юборди. Мураббий: “Уни менга топинг”, деган”, дейди агент.

Унинг айтишича, бу воқеадан бир йил аввал у Ҳусановни Европа клубларига таклиф қилиш учун кўплаб сафарларни амалга оширган.

“Кўпчилик менинг алоқа маълумотларимни сақлаб қўйган экан. Кейин французлар агент Андрей Степанов орқали мен билан боғланишди. Шундан сўнг “Ланс” билан музокаралар жуда тез бошланди. Спорт директори ва бош мураббий Абдуқодирга ишонишларини, уни Кевин Дансонинг келажакдаги ўрнини босувчи сифатида кўраётганларини айтди. Қизиғи шундаки, охир-оқибат Ҳусанов Данcодан ҳам аввал трансфер қилинди”, дейди Ҳасбиуллин.

Агентнинг сўзларига кўра, Ҳусановнинг Беларусга йўл олиши ҳам тасодифий қарор бўлмаган.

“У ерда Анатолий Юревич ишларди. У ёш истеъдодларни ривожлантириш бўйича катта обрўга эга мураббий. Абдуқодир ундан ҳалигача миннатдор. Биламан, у Жаҳон чемпионатидан кейин Юревич билан учрашишни режалаштирган”, дейди у.

Ҳасбиуллин, шунингдек, Россия клублари ҳам Ҳусановга қизиққанини тасдиқлади.

“Юрий Сёмин мендан нега Россия скаутлари бундай иқтидорни вақтида пайқамаганини сўраганди. Аслида улар пайқашган. “Сочи”дан ташқари, “Алания” ҳам Ҳусановни ўз сафига қўшиб олишни истаган. Бу вақтда у аллақачон Беларуснинг “Энергетик-БГУ” клубида тўп сураётган эди”, деди агент.

Унинг таъкидлашича, Ҳусановнинг асосий мақсади аввалдан Европа бўлган.

“Ўшанда Абдуқодирни деярли ҳеч ким танимасди. У 17 ёшида Беларусга кетган, ҳатто “Бунёдкор”нинг захира жамоасида ҳам ўйнамаганди. Унинг орзуси доимо Европа бўлган. Менимча, ўша пайтда Россия клуби таклиф билан чиққан тақдирда ҳам, Абдуқодир рад жавобини берган бўларди. Бугунги кунда ҳам кўплаб иқтидорли ўзбекистонлик ёш футболчилар Россия Премьер-лигасида ўйнашни истамайди. Бунга маълум даражада лиганинг халқаро изоляцияси ҳам сабаб бўлмоқда. Катта мақсад қўйган футболчилар тўғридан тўғри Европа клубларига йўл олишга ҳаракат қилишади”, дейди Ҳасбиуллин.

Маълумот учун, 2025 йилнинг қишида Абдуқодир Ҳусанов Франциянинг “Ланс” клубидан 40 миллион евро эвазига Англиянинг “Манчестер Сити” жамоасига ўтганди. Ўзбекистонлик ҳимоячи “шаҳарликлар” билан 2029 йилнинг ёзигача мўлжалланган тўрт ярим йиллик шартнома имзолаган.