Кореянинг собиқ биринчи хоними пора эвазига давлат ишларига аралашишда айбланмоқда

Жанубий Кореянинг собиқ президенти Юн Сок Ёлнинг рафиқаси Ким Кён Хи қимматбаҳо буюмлар ва пул эвазига давлат ишларига ноқонуний аралашишда айбланмоқда. Бу ҳақда бугун, 29 декабрь куни махсус прокурор маълум қилди.

Қайд этилишича, махсус прокуратура томонидан олиб борилган терговлар бугун, 29 декабрь куни якунланган. Прокуратура баёнотида собиқ биринчи хоним Кимнинг пора олгани ва давлат ишларига ноқонуний аралашганлиги келтирилган.

“Ким президент рафиқаси мақомидан фойдаланиб, пул ва қимматбаҳо буюмларни қабул қилган, шунингдек турли лавозимларга тайинлаш ва номзодларни илгари суриш жараёнларида фаол иштирок этган”, дейди махсус прокурор Мин Жонг Ки тергов якунларига бағишланган матбуот анжуманида.

Кимнинг адвокатлари ҳам шу куннинг ўзида баёнот берган. 

“Терговлар кимнингдир гапи билан эмас, балки охир-оқибат судда далиллар асосида якунланади”, дейди улар. 

Адвокатлар, шунингдек, “фактлар бўрттириб кўрсатилмаслиги ёки сиёсий мақсадларда бузиб талқин қилинмаслиги учун процессуал қонунийлик ва ҳимоя ҳуқуқлари тўлиқ таъминланиши” учун ҳаракат қилишини билдирган.

Шу билан бирга, прокуратура гуруҳи “Бирлашиш” черкови раҳбари Хан Хак Жани ҳам айбламоқда. У диний гуруҳ номидан Ким Кён Хига нуфуз қозониш мақсадида иккита Chanel сумкаси ва олмосли маржон тақдим этганликда гумон қилинмоқда. Айни пайтда мазкур иш бўйича суд жараёни давом этмоқда. Хан Хак Жа ўз черковини Кимга пора беришга ундаганини рад этган.

“Бир-бирига алоқаси бўлмаган турли шахслар президентга эмас, айнан Ким Кён Хига мурожаат қилган, ўз истакларини билдирган ва пул ҳамда мол-мулк тақдим этган. Натижада уларнинг талаблари бажарилган”, дейди махсус прокурор ёрдамчиси Ким Хён Гун.

Ким Кён Хи ўзига қўйилган барча айбловларни рад этмоқда. У шу ой бошида бўлиб ўтган суд мажлисида жамоатчиликда хавотир уйғотгани учун узр сўраган.

Маълумот ўрнида, лавозимидан ағдарилган президент Юн Сок Ёль давлат тўнтариши уюштиришда гумон қилиниб судланмоқда. У умрбод қамоқ ёки ҳатто ўлим жазосига ҳукм қилиниши мумкин. Юн ўзига қўйилган айбловларни рад этмоқда. Ушбу иш бўйича қуйи суд қарори 2026 йил 28 январь куни чиқарилиши кутилмоқда.

Эслатиб ўтамиз, аввалроқ прокуратура жорий ой бошида собиқ биринчи хоним Ким Кён Хига нисбатан 15 йиллик қамоқ жазосини сўраганди. У воситачилик қилиш ва бошқа айбловлар доирасида пора олганликда гумон қилиниб, ҳозирда ҳибсда сақланмоқда.