Корея орзусидагиларни қарийб $200 мингга “ухлатган”лар ушланди

Корея давлатига кетмоқчи бўлган 20 дан ортиқ фуқароларнинг истагини Миграция агентлигидаги танишлари орқали рўёбга чиқаришни айтиб, қарийб 200 минг АҚШ долларига чув туширган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, Департаментнинг Ҳазорасп тумани бўлими томонидан ўтказилган терговга қадар текширувларда фуқаро Д.М. ва бошқалар ўзаро тил бириктириб, фуқаролар Б.Й. ва Ш.Ў.ни Миграция агентлигида ишловчи танишлари орқали Корея давлатига ишга юборишини айтиб, 15 500 АҚШ долларини фирибгарлик йўли билан қўлга киритганликлари аниқланган. Ушбу пуллар ҳисобидан 1 500 АҚШ долларининг қайтарилиши процессуал тартибда расмийлаштирилган.

Текширувда Д.М. ва бошқалар яна 17 нафар фуқарони Корея давлатига кетиш учун ўтказиладиган имтиҳонларини ижобий ҳал қилиб беришлари эвазига 159 500 АҚШ долларини фирибгарлик йўли билан қўлга киритганликлари аниқланган.

Яна бир ҳолат, фуқаро Х.Х. фуқаро К.А.ни Корея давлатига кетиш учун ўтказиладиган имтиҳонларини ижобий ҳал қилиб бериши эвазига 10 000 АҚШ долларини фирибгарлик йўли билан қўлга киритганлиги аниқланиб, 10 000 АҚШ долларининг қайтарилиши процессуал тартибда расмийлаштирилган.

Билдирилишича, мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ ҳам Жанубий Корея давлатига ишга бормоқчи бўлган яна 20 нафар Ўзбекистон фуқароси фирибгарликка учрагани хабар қилинганди.