Икки вазн тоифасида UFC собиқ чемпиони, ирландиялик Конор Макгрегор жинсий зўравонликда гумон қилинмоқда. Бу ҳақда “The New York Times” хабар қилди.
Маълум қилинишича, тахмин қилинаётган жиноят 2018 йилда Ирландия пойтахти Дублинда содир бўлган. Судга жабрланувчи ва унинг онаси шикоят аризаси билан мурожаат қилган.
“Гувоҳнинг кўрсатмалари олинди, видео лавҳалар ўрганилди. Натижада фактлар аризадаги кўрсатмаларга зид келди. Биз ҳар қандай норозиликни рад қиламиз”, дейди спортчининг вакили Карен Кесслер.
Маълумот ўрнида, ўтган йилнинг сентябрь ойида ҳам Конор жинсий зўрлаш ва аҳлоқсизликда айбланиб, ҳибсга олинган эди. Спортчи сўроқ қилинганидан сўнг, қўйиб юборилган.
Эслатиб ўтамиз, жорий йилнинг 24 январь куни Конор Макгрегор Дастин Порьега қарши октагонга чиқади. Шу пайтгача уч маротаба катта спорт билан ҳайрлашган Конор ҳисобида 22 та ғалаба ва 4 та мағлубият бор. Унинг рақиби Дастин Порье эса, фаолиятида шу пайтгача 26 та ғалаба ва 6 та мағлубият қайд этган.