Ким Чен Ин қизи билан Пхеньяндаги парадда қатнашди (фоторепортаж)

Кеча, 8 сентябрь куни Пхеньянда Корея Халқ Демократик Республикаси (КХДР) ташкил топганининг 75 йиллиги муносабати билан қуролли фуқаро мудофааси кучларининг паради бўлиб ўтди. Унда Шимолий Корея раҳбари Ким Чен Ин қизи Ким Чжу Э билан бирга иштирок этди. Бу ҳақда КХДР давлат радиоси “Корея овози” хабар берди.

Парад Ким Ир Сен майдонида бўлиб ўтган. Тадбир давомида парашютчилар парвоз қилиш техникасини бажариб, давлат байроғи билан қўнган, осмонда “75” рақами тасвирланган самолётлар учган. Фахрий қоровул ва оркестр чиқиш қилган.

Парадга Хитой Коммунистик Партияси Марказий қўмитаси сиёсий бюроси аъзоси, ХХР Давлат кенгаши Бош вазирининг ўринбосари Лю Гочжун бошчилигидаги Хитой Халқ Республикаси партия-ҳукумат делегацияси, А. В. Александров номидаги Россия армиясининг академик ашула ва рақс ансамбли, шунингдек, Хитой ва Россиянинг Пхеньяндаги дипломатлари таклиф этилган.

Бундан ташқари, ишчи ва деҳқон қизил милицияси экипажлари, шунингдек, унинг механизациялашган бўлинмалари тантанали маршда ўтган. Мотоцикллар, танкга қарши ракеталарга эга тракторлар, зенит ва ракета қуроллари мамлакатнинг бош майдонидан ўтган.

Эслатиб ўтамиз, жорий йилнинг февраль ойида Корея халқ армияси ташкил этилганининг 75 йиллиги муносабати билан ўтказилган ҳарбий парадда ҳам Ким Чен Ин қизи билан қатнашганди. Июль ойида Корея уруши тугаганининг 70 йиллиги муносабати ўтказилган парадда эса Ким Чен Ин Россия Мудофаа вазири Сергей Шойгу ва Бутунхитой халқ вакиллари кенгаши доимий қўмитаси раиси ўринбосари Ли Хончжонг билан бирга ҳарбий техникаларни кузатганди.