“Хотинингиз сизни урадими?”. Макрон Францияда мемга айланди

Франциядаги спорт залида ўзини ҳимоя қилиш курсига бағишланган эълонда хотинидан шапалоқ еган Президент Эммануэль Макрон устидан ҳазил қилинди. Буни ижтимоий тармоқларда тарқалган суратларда кўриш мумкин.

Реклама плакатида Макроннинг пешонасида кўкарган жой акс этган, у бир кўзини қўли билан бекитган.

“Хотинингиз сизни урадими? Ўзини ҳимоя қилиш курсларига ёзилинг! Қўшимча маълумот учун маъмуриятга мурожаат қилинг”, дейилади плакатдаги ёзувда.

Ушбу сурат спорт залининг ичида олингани тахмин қилинмоқда. Бундан ташқари, ижтимоий тармоқ фойдаланувчилари Макрон билан боғлиқ ҳолатни турли кўринишда мемга айлантирмоқда.

Эслатиб ўтамиз, мазкур ҳазиллар 25 май куни юз берган воқеага ишора қилади. Ўша куни Президент Эммануэль Макрон рафиқаси Брижит билан Вьетнамга ташриф буюрганди. Самолётдан тушаётган пайтда журналистлар Макроннинг юзига урилган лаҳзани тасвирга олган – кадрда Брижит тўлиқ кўринмаса-да, айнан унинг қўллари Президентнинг иягини кучли туртгани акс этган. Ушбу ҳолатга тайёр бўлмаган Макрон қаттиқ ҳайратга тушиб, бир неча сония оғзи очиқ ҳолда қотиб қолган.

Аввалига Елисей саройи Брижит Макрон ва Эммануэль Макроннинг ҳаракатлари ҳеч қандай кучли жанжални ёки ўзаро келишмовчиликни англатмаслигини ва бу оддий ҳазил эканини  маълум қилди. Бироқ Президентнинг яқин дўстларидан бири бу воқеани “эр-хотиннинг кичик жанжали” деб атади. Ўз навбатида, Макрон бу тахминни рад этиб, улар ҳазиллашганини айтди.