Хитойда 19 метрли қорбола ясалди (видео)

Хитойнинг “қиш пойтахти” дея эътироф этиладиган Харбин шаҳрида олти қаватли бино баландлигига тенг улкан қорбола бунёд этилди. Ноёб қор ҳайкали атиги 11 кун ичида ясалди. Бу ҳақда “The Sun” хабар берди.

Қайд этилишича, қор ва муз ҳайкалтарошлиги билан машҳур бўлган Харбин шаҳрида ҳар йили халқаро фестиваль ўтказилади. Бироқ бу йил шаҳар аҳолиси ва меҳмонларини яна бир ноодатий лойиҳа – қарийб 19 метр баландликдаги гигант қорбола ҳайратга солди. 

Маълум қилинишича, ҳайкални яратиш учун махсус техникалар ёрдамида тайёрланган қарийб 33,5 минг кубметр қор олиб келинган. Дастлаб қор вақтинчалик ёғоч конструкцияга жойлаштирилган бўлса-да, барча асосий ишлов жараёнлари ҳайкалтарошлар томонидан қўлда – кескилар ва бошқа махсус асбоблар ёрдамида амалга оширилган.

Лойиҳа устида 100 нафар ишчи ва 64 нафар ҳайкалтарошдан иборат жамоа меҳнат қилган. Қурилиш жараёни ташкилотчилар томонидан жонли эфир орқали намойиш этилиб, томошабинлар уни реал вақт режимида кузатиш имконига эга бўлишган.

Улкан қорбола ижтимоий тармоқларда ҳам катта қизиқиш уйғотди. Фойдаланувчилардан бири уни “оддий қорбола эмас, балки ҳақиқий қор ёдгорлиги” деб атаган бўлса, яна бири “бу қиш мавсумининг энг юқори даражадаги энергияси” дея баҳолаган.