Хитой-ўзбек вакцинаси хавфлими? Хоразмдаги ҳолат бўйича муносабат билдирилди

Жамият 25428
image

Кеча, 28 август куни ижтимоий тармоқларда Хоразм вилоятида хитой-ўзбек вакцинаси олгандан кейин аҳволи оғирлашган фуқаро ҳақида видео лавҳа тарқалгани ҳақида хабар берган эдик.

Соғлиқни сақлаш вазирлиги зудлик билан ушбу вазият назоратга олингани, беморнинг аҳволини ўрганиш ва бу ҳолат нима сабабдан юз берганига аниқлик киритиш мақсадида тажрибали инфеционист, реанематолог, офталмолог, вирусолог, иммунолог, невропатолог, психолог каби мутахассисларидан иборат тезкор гуруҳ тузилганлиги ҳақида хабар берди.

Хўш, хитой-ўзбек вакцинаси атрофидаги шов-шувлар ва бу вакцинага ишончсиз қараётган айрим фуқароларнинг фикрлари қай даражада асосли? Фармацевтика тармоғини ривожлантириш агентлиги мазкур мавзу юзасидан қуйидагиларни маълум қилди.

Маълум қилинишича, ўтган йилнинг 19 ноябрь куни Инновацион ривожланиш вазирлигининг Илғор технологиялар маркази Фармацевтика тармоғини ривожлантириш агентлиги ҳузуридаги Давлат марказига хитой-ўзбек вакцинасининг сифат назорати текширувларини ўтказиш учун вакцина, плацебо намуналари ва тегишли стандартлар ҳамда реагентлар тақдим қилган.

“Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК томонидан белгиланган тартибда мазкур вакцинанинг барча хавфсизлик кўрсаткичлари синовдан ўтказилган ва унинг ижобий натижалари шунингдек, Этика қўмитасининг вакцинани клиник тадқиқотлари ўтказишнинг этика жиҳатидан асосланганлиги тўғрисидаги хулосалари асосида аҳоли орасида учинчи босқич клиник синовларга йўналтирилган.

Zhifei Longcom Biopharmaceutical Co. Ltd компанияси коронавирусга қарши вакцинани яратишда Ўзбекистоннинг ҳиссаси ва cаъй-ҳаракатларини инобатга олиб, ZF 2001 вакцинани бирга яратган ҳаммуаллиф мамлакат сифатида белгилаган.

Ушбу янги вакцинани ZF-UZ-VAC 2001 номи билан биргаликда ишлаб чиқариш ва фойдаланилишга келишилгани билдирилган.

Жорий йилнинг 1 март санасида ZF-UZ-VAC 2001 коронавируснинг янги типига қарши рекомбинант (CHO cell) вакцина тиббиёт амалиётида қўллаш учун тегишли тартибда Фармацевтика тармоғини ривожлантириш агентлиги ҳузуридаги Давлат марказиг томонидан давлат рўйхатидан ўтказилгаан. (Рўйхат рақами - DV/X 08646/03/21)

Жорий йилнинг 27 август, Хитойлик ҳамкорлар томонидан коронавирусга қарши ZF-UZ-VAC2001 вакцинасининг 3-фаза клиник синовлари вакцина барча штаммлар учун умумий 81,76 фоиз самарадорликни кўрсатгани эълон қилинди.

Унга кўра, 3-дозадан сўнг вакцинанинг самарадорлиги барча штаммлар учун умумий 81,76 фоиз, “британча” штаммга қарши эса 92,93 фоизни ташкил этди. Ўлим ва оғир холатларга қарши 100 фоиз самарадорлигини кўрсатди. ЖССТ талабларига кўра вакцина камида 50 фоиздан юқори самара бериши лозим.

Қайд этилишича, Жаҳон соғлиқни сақлаш ташкилоти протоколига кўра 3-фаза синовларини очиқлаш ҳамда статистик таҳлиллар ўтказиш учун тўлиқ вакцинадан сўнг камида 156 ҳолда касаллик аниқланиши керак. ZF-UZ-VAC2001 вакцинасининг 3 фаза клиник синовлари натижаси 221 нафар касаллик аниқланган иштирокчилардаги таҳлилга кўра аниқланди ва бу синов натижасини янада аниқроқ бўлишини таъминлайди.

Агентликнинг билдиришича, ушбу халқаро миқёсдаги ZF-UZ-VAC2001 вакцинасининг III фаза кўпмарказли клиник тадқиқотлари 2020 йилнинг 10 декабридан бошланган бўлиб, синовларда 18 ёшдан катта бўлган жами 29 000 нафар киши қамраб олинган. Мазкур тадқиқотлар Хитойнинг Хунан вилоятида, шунингдек Ўзбекистон, Индонезия, Покистон ва Эквадор давлатларида ўтказилган. Ўзбекистонда клиник тадқиқотлар Zhifei Longcom Biopharmaceutical Co.Ltd компаниясининг 8 нафар мутахассислари, Инновацион ривожланиш вазирлиги ҳузуридаги Илғор технологиялар марказининг 30 нафар олимлари, Соғлиқни сақлаш вазирлиги ҳузуридаги Вирусология илмий-тадқиқот институти ва бошқа тиббиёт муассасаларининг 112 нафар тиббиёт ходимлари томонидан ўтказилмоқда. Call-марказда 32 нафар ходим фаолият юритиб, клиник синовларида иштирок этган кўнгиллилардан ҳар куни телефон орқали хабар олиб турилган.

Клиник тадқиқотларда Ўзбекистондан жами 6966 нафар кўнгилли иштирок этди, улардан 214 нафари 60 ёшдан катта кишилар бўлган. Тадқиқотлар давомида ҳар бир кўнгилли иштирокчи 28 кун оралиғи билан 3 та дозада “вакцина/плацебо” схемасида эмланган. Улардан 13 кишида ўрта даражадаги ножўя таъсир аниқланган бўлиб, 0,002 фоиздан кам кўрсаткичдир. Алоҳида ажратилган гуруҳларда 95 фоиз ҳолатларда етарли даражада антитаналар ишлаб чиқарилгани аниқланган.

“Хулоса ўрнида барча юртдошларимиздан Хоразмда юз берган ҳолат бўйича вазиятни тўлиқ ўрганмасдан турли ўринсиз, асосланмаган хабарларни тарқатмасликларини сўрардик!” дейилади агентлик хабарида.

Суннатилла Абдуллаев
Мақолага баҳо беринг
Баҳолаганлар: 1169
Рейтинг: 3
Теглар
t
×