Канада Бош вазири кўчирмакашликда гумонланмоқда

Канада Бош вазири Марк Карни Оксфорд университетида иқтисодиёт бўйича докторлик даражасини олиш учун 1995 йилда ёзган “Рақобатнинг динамик устунлиги” номли диссертацияси уч нафар университет академиги томонидан ўрганилди ва ушбу материалда ўнта аниқ плагиат ҳолати аниқланди. Бу ҳақда “National Post” нашри хабар берди.

Нашрнинг ёзишича, диссертациянинг бир нечта бўлимида Карни тўлиқ иқтибослар, парафразалар ёки бироз ўзгартирилган жумлаларни аввалроқ ёзилган илмий ишдан муаллифга тегишли ишора бермасдан ишлатган.

“У шунчаки тўғридан тўғри такрорлаган, лекин қўштирноқ ишлатмаган. Биз буни плагиат деб атаймиз”, деди Британиянинг Колумбия университети Оканаган филиали ректори ҳузуридаги талабаларнинг интизомий масалалари бўйича маслаҳат қўмитаси аъзоси, доцент Жоффри Сигалет.

Ушбу қўмита университетда плагиат билан боғлиқ ишларни кўриб чиқади. “National Post” нашри Карни жамоасига ушбу ўнта плагиат ҳолатини тақдим этган.

Карнининг сайлов штаби дастлаб Оксфорд университетидаги унинг докторлик раҳбарининг баёнотини тақдим этган.

“Сиз бу ишни нотўғри талқин қиляпсиз, деб ҳисоблайман. Қарийб 40 йиллик академик тажрибага эга инсон сифатида мен сиз тилга олган диссертацияда плагиат борлигига ёки одатдагидан ташқари академик амалиётлар қўлланилганига ҳеч қандай далил кўрмаяпман”, дейди Нуффилд коллежининг расмий иқтисод фанлари ходими, америкалик иқтисодчи Маргарет Мейер тақдим этилган баёнотда.

Мейер, шунингдек, Маркнинг диссертацияси факультет қўмитаси томонидан баҳоланганини ва тасдиқланганини таъкидлаган.

Оксфорд университети плагиат тушунчасини қуйидагича таърифлайди:

“Бошқа манбадан олинган иш ёки ғояларни ўзингизники сифатида тақдим этиш, яъни уларни тўлиқ манбага ишора бермасдан ишга киритиш”.

Оксфорд университети битирувчиси бўлган профессорлардан бири Карни томонидан судга берилишдан хавотирда бўлгани сабабли анонимлик шарти билан гапириб, либерал етакчининг диссертациясидаги муаммоли парчалар плагиат таърифига мос келишини тасдиқлаган.

Эслатиб ўтамиз, январь ойи бошида Жастин Трюдо ҳукмрон Либерал партия раиси лавозимини тарк этишини, аммо Бош вазирликдан партиянинг янги раҳбари сайлангандан кейин истеъфога чиқишини маълум қилган эди. Шунингдек, Трюдо Канада генерал-губернатори Мери Саймондан парламент фаолиятини 24 мартгача тўхтатишни сўраган. Кейинроқ эса Канаданинг собиқ Марказий банки раҳбари Марк Карни Либерал партиянинг янги етакчиси этиб сайланди ва 14 март куни қасамёд қилиб, ўз лавозимига киришди.