Қуръони Каримни ҳақоратлаган шахсга нисбатан жиноят иши очилди – ИИВ

Шу кунларда ижтимоий тармоқларда турли диний адоватни қўзғатиш ва диндорлар орасида муросасизликни келтириб чиқаришни тарғиб қилувчи маълумотлар тарқалмоқда.

Хусусан, жорий йилнинг 29 октябрь куни ижтимоий тармоқларда ўзини “атеист”, деб таништириб, у томонидан Ислом динининг илоҳий манбаси ва энг муқаддас китоби – Қуръони Каримга нисбатан ҳурматсизлик акс этган видеолавҳа тарқалди ҳамда кескин баҳс-мунозара ва норозиликларга сабаб бўлди.

Мазкур ҳолат юзасидан Ички ишлар вазирлиги расмий муносабат билдирди ва видеодаги фуқаронинг шахси аниқланганини маълум қилди.

Ҳуқуқ-тартибот идоралари томонидан олиб борилган суриштирувлар давомида, мазкур шахс Мингбулоқ туманидан бўлган Шерзод Турдиев эмаслиги аниқланган.

Ўтказилган текширув ҳаракатлари натижасида, ушбу видеотасвирни суратга олиб, ижтимоий тармоқларга жойлаштирган шахс аниқланиб, терговга қадар текширув ҳаракатларига жалб қилинди.

Текширув натижасига кўра, мазкур шахсга нисбатан Ўзбекистон Республикаси Жиноят кодексининг 156-моддаси 2-қисми (Миллий, ирқий, этник ёки диний адоват қўзғатиш) билан жиноят иши қўзғатилиб, тергов ҳаракатлари олиб борилмоқда.

Жиноят иши бўйича тергов натижасига кўра, қўшимча маълумот бериб борилади.

“Шу ўринда, фуқароларимиздан юртимизда диний бағрикенглик ва миллатлараро тотувлик каби азалий анъаналаримизга кундалик ҳаётимизда амал қилишларини ҳамда муқаддас динимизни оёқ-ости қилиб, аҳоли орасида ихтилофлар келтириб чиқаришга бўлган уринишлар учун қонунда жавобгарлик белгиланганлигини эслатиб ўтамиз”, дейилади вазирлик баёнотида.

Аввалроқ, мазкур воқеа юзасидан Ўзбекистон Мусулмонлари идораси ҳам расмий муносабат билдириб, Қуръони Каримни ҳақоратлашга ҳеч кимнинг ҳаққи йўқлигини таъкидлаганди.