Қўлга олинган намойишчиларни ўлдирмаймиз – Ароқчи

Эрон ҳукумати норозилик намойиши иштирокчиларини осиб қатл этишни режалаштирмаяпти ва бундай сценарий ҳатто кўриб ҳам чиқилмайди. Бу ҳақда Эрон Ташқи ишлар вазири Аббос Ароқчи “Fox News” телеканалига берган интервьюсида маълум қилди.

Вазирнинг таъкидлашича, бундай миш-мишлар ҳақиқатга тўғри келмайди.

“Осиб қатл этиш ҳақида гап ҳам бўлиши мумкин эмас. Бу – дезинформация кампаниясининг бир қисми бўлиб, унинг мақсади АҚШ Президенти Дональд Трампни вазиятга аралашишга ундашдир. Бундай аралашув эса ҳалокатли оқибатларга олиб келиши мумкин”, деган Ароқчи. 

Шу тариқа, Эрон ТИВ раҳбари мамлакат расмийларининг намойишчиларга нисбатан ўлим жазоси қўллаш нияти борлигини қатъиян рад этган.

Вазирнинг таъкидлашича, Эронда бир неча кундан бери намойишлар ўтказилмаяпти ва мамлакатдаги тартибсизликлар якунланган. У ҳукумат вазиятни тўлиқ назорат остига олганини ҳам қўшимча қилган.

Қайд этиш жоиз, аввалроқ Теҳрон прокурори Али Солиҳий жамоат ва давлат мулкига зарар етказган акциялар иштирокчиларига нисбатан ўлим жазоси қўлланиши мумкинлигини илгари маълум қилган эди.

Маълумот учун, Эрон ҳудудида оммавий норозилик намойишлари ўтган йилнинг 28 декабридан бери давом этмоқда. Дастлаб улар оғир иқтисодий вазият ва миллий валюта курсининг кескин пасайиши сабабли бошланган, бироқ тез орада сиёсий мазмун ҳам касб этган.

Низолар фонида Қўшма Штатлар ўз фуқароларини Эронни зудлик билан тарк этишга чақирган. 

Эслатиб ўтамиз, аввалроқ Эронда давом этаётган норозилик намойишлари оқибатида камида 12 минг киши, катта эҳтимол билан ундан ҳам кўпроқ одам ҳалок бўлгани ҳақида хабар берилганди. Сўнгги беш кун давомида Эрон ҳукумати мамлакатда интернет ва телефон алоқасини узиб қўйгани сабабли аниқ маълумотлар олишни умуман иложи бўлмаяпти. Эрондаги ички манба чет элга қўнғироқ қилишга муваффақ бўлиб, ҳалок бўлганлар сони камида 12 минг, эҳтимол 20 минггача етгани ҳақида очиқлаган.