Эрондаги намойишларда 12 мингдан ортиқ одам ҳалок бўлди – ОАВ

Эронда давом этаётган норозилик намойишлари оқибатида камида 12 минг киши, эҳтимол ундан ҳам кўпроқ одам ҳалок бўлди. Бу ҳақда Ислом Республикаси ичидаги манбаларга таяниб, “CBS News” хабар берди.

Нашрнинг ёзишича, сўнгги беш кун давомида Эрон ҳукумати мамлакатда интернет ва телефон алоқасини узиб қўйгани сабабли аниқ маълумотларни топишнинг умуман иложи йўқ. Эрондаги ички манба чет элга қўнғироқ қилишга муваффақ бўлиб, ҳалок бўлганлар сони камида 12 минг, эҳтимол 20 минггача етгани ҳақида очиқлаган.

Нашр, шунингдек, мухолиф “Iran International” телеканали ҳам бу маълумотни тасдиқлаганини билдирган. Вашингтондаги, Эрондаги алоқаларга эга манбанинг айтишича, қурбонлар сони эҳтимол 10 мингдан 12 минггача ҳам бўлиши мумкин.

АҚШ Президенти Дональд Трамп кеча, 13 январь куни Эрондаги намойишчиларга мурожаат қилиб, давлат идораларини назоратга олишга чақирган ва Вашингтон томонидан қўллаб-қувватлаш ваъда қилган.

Эрон ҳудудида оммавий норозилик намойишлари ўтган йилнинг 28 декабридан бери давом этмоқда. Дастлаб улар оғир иқтисодий вазият ва миллий валюта курсининг кескин пасайиши сабабли бошланган, бироқ тез орада сиёсий мазмун ҳам касб этган.

Низолар фонида Қўшма Штатлар ўз фуқароларини Эронни зудлик билан тарк этишга чақирган. Мамлакатдаги Америка фуқаролари интернетда кейинги узилишларга дуч келиши кутилмоқда. 13 январь куни АҚШнинг Теҳрондаги виртуал элчихонаси веб-сайтида жойлаштирилган хабарга кўра, муқобил алоқа воситаларини олдиндан кўриб чиқишлари керак.  

Шунингдек, америкаликларга Эронни Арманистон ёки Туркия орқали қуруқлик орқали тарк этишни кўриб чиқиш тавсия қилинган.

Эслатиб ўтамиз, аввалроқ “Reuters” агентлиги Эронда норозилик намойишлари бошлангандан бери, хавфсизлик ходимлари билан бирга 2000 га яқин одам ҳалок бўлгани ҳақида хабар берганди.