Qozog‘istonning 54 qishlog‘i spirtli ichimliklardan voz kechdi

Qozog‘istonning Atirau viloyati 7 ta tumanidagi 54 ta qishloq aholisi spirtli ichimliklardan voz kechdi. Bu haqda viloyat politsiya departamentiga tayanib, “Kazinform” xabar berdi.

“Inder tumani Qurilis qishlog‘i aholisi 5 yil oldin spirtli ichimliklardan voz kechish yo‘lida qadam tashlagan. Natijada bir yil davomida qishloqda birorta ham jinoyat qayd etilmagan. Bu boshqa qishloqlarga ham ijobiy ta’sir ko‘rsatdi. 20 fevralga kelib, Atirau viloyatida ichkilik iste’mol qilmaydigan qishloqlar soni 54 taga yetdi”, deyiladi xabarda.

Qayd etilishicha, spirtli ichimliklardan voz kechgan qishloqlar soni bo‘yicha Qizilqogin tumani yetakchilik qilmoqda. Bu yerda 17 ta qishloq aholisi ichimlik iste’mol qilmaydi. Rossiya bilan chegaradosh bo‘lgan Qurmang‘azi tumanida ham 16 ta qishloq aholisi spirtli ichimliklardan voz kechgan. Maxambet tumanida – 7 ta, Isatayda – 6 ta, Inderda – 4 ta, Jilioyda – 3 ta, Makat tumanida esa 1 ta qishloq aholisi ichkilikdan butkul voz kechgan.

Inder tumanining Qurilis qishlog‘ida ikkita oziq-ovqat do‘koni bor. Ulardan birining sotuvchisi Asel Imangaliyevaning aytishicha, kundalik iste’mol mahsulotlarini sotishdan tushadigan daromad ham yetarli.

“Spirtli ichimlik va tamaki sog‘liqqa ham, inson taqdiriga ham katta zarar keltiradi. Ular insonni yomon odatlarga o‘rgatadi. Shu sababli qishloq aholisi tashabbusini qo‘llab-quvvatladik va do‘konda faqat oziq-ovqat mahsulotlarini sotish haqida qaror qabul qildik”, deydi Imangaliyeva.

Jarsuot qishloq okrugi hokimi Erbol Bokeyevning aytishicha, o‘tgan yili qishloq ko‘chalari asfaltlangan, yoritish tizimi o‘rnatilgan va yozgi suv quvuri tortilgan. Shuningdek, qishloqda internet tarmog‘i ham mavjud.

“Bizning qishloq aholisi allaqachon spirtli ichimliklardan voz kechgan. Katta avlod nasihatlariga quloq solayotgan yoshlarimiz yaxshi natijalarga erishmoqda. Ularning aksariyati sport bilan shug‘ullanadi. Yaqinda qishlog‘imizda kichik yoshdagi bolalar uchun o‘yin maydonchasi ham qurildi”, deydi qishloq aholisi vakili Aygul Qajigaliyeva.

Eslatib o‘tamiz, avvalroq o‘tgan yilning mart oyida Qozog‘iston Prezidenti Qosim-Jomart To‘qayev mamlakatda go‘yoki milliy an’analar niqobi ostida kelin o‘g‘irlash amaliyotini joriy etishga urinayotganlar borligini aytgandi. Uning so‘zlariga ko‘ra, qozog‘istonliklar mamlakatdagi an’anaviy islom qonunlariga qat’iy amal qilgan holda diniy ekstremizm va arxaizmga qarshi turishi kerak.