Қизириқ тумани собиқ ҳокими 8 йилга “кесилди”

Сурхондарё вилояти Қизириқ туманининг собиқ ҳокими Рустам Пардаев 8 йил 6 ой муддатга озодликдан маҳрум этилди. Бу ҳақда Олий суд матбуот котиби хабар берди.

Жорий йилнинг 7 декабрь куни жиноят ишлари бўйича Термиз туман суди ўз биносида очиқ суд мажлисида Рустам Пардаев жиноят ишини кўриб чиққан.

Суд ишида Рустам Пардаев Ўзбекистон Республикаси Жиноят кодексининг 205-моддаси 2-қисми “а” банди, 168-моддаси 4-қисми “а” банди, 167-моддаси 3-қисми “а” банди ва 209-моддаси 2-қисми “а” бандида назарда тутилган жиноятларни содир этганликда айбли деб топилган.

Рустам Пардаевга нисбатан Жиноят кодексининг 59-моддасига асосан тайинланган жазоларни қисман қўшиш йўли билан узил-кесил 2 йил 6 ой муддатга давлат органи, давлат иштирокидаги ташкилотларда мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиниб, 8 йил 6 ой муддатга озодликдан маҳрум қилиш жазоси тайинланган. Жазо умумий тартибли колонияларда ўтаттирилиши, жазони ўташ муддати 2023 йил 5 июль кунидан бошлаб ҳисобланиши белгиланган.

“Ҳозирги кунда Р.Пардаев ва унинг ҳимоячилари томонидан биринчи инстанция судининг ҳукми устидан апелляция тартибида берилган шикояти Сурхондарё вилоят суди жиноят ишлари бўйича судлов ҳайъати апелляция инстанциясида кўриш учун расмийлаштирилмоқда”, дейилади хабарда.

Маълумот учун, Рустам Пардаев Убодуллаевич Ўзбекистон Республикаси Жиноят кодексининг 205-моддаси 2-қисми “а” банди, 205-моддаси 2-қисми “а” банди, 209-моддаси 2қисми “а” банди, 167-моддаси 3-қисми “а” банди, 28,209-моддаси 2-қисми “а” банди, 228-моддаси 2-қисми “а,б” бандлари, 168-моддаси 4-қисми “а” банди, 168-моддаси 4-қисми “а” банди, 205-моддаси 2-қисми “а” банди, 167-моддаси 3-қисми “а” банди билан айбланган эди.

Рустам Пардаев 1979 йил 7 апрель куни Қизириқ туманида туғилган. 2020 йил ноябрь ойидан 2022 йил январь ойига қадар Денов тумани ҳокими лавозимида, 2022 йилнинг 1 февраль кунидан 2023 йилнинг январь ойида қадар Қизириқ тумани ҳокими лавозимида, судгача “Ўзагросуғурта” АЖ Сурхондарё вилоят филиали бошлиғи лавозимида ишлаган.