Қирғизистонда эркак 20 йиллик синфдошлар йиғилишига борган хотинини отиб ташлади

Қирғизистоннинг Ўзган шаҳрида синфдошларининг 20 йиллик “юбилей”ига борган аёл эри томонидан ўқотар қурол билан отиб ўлдирилди. Бу ҳақда “Sputnik” хабар берди.

Ўш вилояти милицияси маълумотига кўра, ушбу ҳолат жорий йилнинг 26 май куни содир бўлган. Милицияга 1987 йилда туғилган аёл танасидан олган жароҳати туфайли шифохонага етиб бормай вафот этгани ҳақида хабар келиб тушган.

Ижтимоий тармоқларда тарқалган хабарга кўра, аёл 26 май куни синфдошлари билан мактаб битирувининг 20 йиллигини нишонлаш учун ўзи ўқиган мактабига борган ва унинг эри ҳам аёлга эргашган. Тантанали чиқиш давомида аёл ўз синфдошининг қўлидан тутиб чиққани учун эрининг жаҳли чиққан ва у аёлини отиб ўлдиришга қарор қилган.

Мазкур ҳолат расмий қайдга олинган ва Ички ишлар бўлимига юборилган. Терговолди текширув ишлари бошланган ва суд-тиббий экспертиза тайинланган. Тўпланган материаллар асосида Қирғизистон Жиноят кодексининг 122-моддаси (қотиллик) бўйича жиноят иши қўзғатилган ва тезкор тергов ҳаракатлари бошланган.

Тезкор қидирув ишлари натижасида жиноятда гумон қилинувчи сифатида марҳуманинг эри, 1985 йилда туғилган фуқаро ушланган ва вақтинча қамоққа олинган.

Милиция воқеа тафсилотлари ҳақида батафсил маълумот бермаган. Гумондорнинг яқинлари ва адвокати ҳозирча фикр билдирмаган.

Эслатиб ўтамиз, аввалроқ Туркиянинг Алачам туманида эркак дастлаб турмуш ўртоғини, сўнгра ўзини отиб ўлдирганди. 40 ёшли Женгиз Алтинел исмли эркак яқинда ажрашиши керак бўлган 32 ёшли хотини Пинар Алтинел билан кўришиб, у билан гаплашиб олмоқчи бўлган. Гаплашиб олиш учун ёқилғи қуйиш шохобчасининг ресторан қисмига борган. Эр-хотин ўртасидаги жанжал тезда қуролли ҳужумга айланган. Женгиз Алтинел ўзи билан олиб борган қурол билан рафиқасини отиб ўлдирган, кейин эса ўша қурол билан ўз жонига ҳам қасд қилган.