Қирғизистон собиқ бош прокурори ҳибсга олинди

Қирғизистоннинг собиқ бош прокурори, муваққат ҳукумат аъзоси Азимбек Бекназаров разведка ходимлари томонидан ўғрилик ва пул ювишда гумонланиб, ҳибсга олинди. Бу ҳақда АКИpress хабар берди.

Нашрга кўра, махсус хизмат Азимбек Бекназаровга нисбатан 2010 йил апрель ойида бўлиб ўтган воқеалар давомида банк ғазналаридан ва ҳукумат уйидан пулларни ўғирлаш ҳамда ўзлаштириш бўйича жиноий иш қўзғатган. Тергов маълумотларига кўра, Бекназаров ушбу ҳолатларда ҳуқуқни муҳофаза қилиш органлари томонидан олиб қўйилган катта миқдордаги пулни ўзлаштирган.

“Тергов давомида олинган маълумотлар Бекназаров томонидан Иссиқкўл курорт зонаси ҳудудида, Бишкек, Чуй ва Жалолобод вилоятларида қимматбаҳо кўчмас мулк объектларини сотиб олиш ва уларни сохта шахсларга рўйхатдан ўтказиш орқали жиноий йўл билан олинган ушбу маблағларни легаллаштиришни кўрсатади”, дейилади хабарда.

Тергов хулосасига кўра, Бекназаров айбдор деб топилган ва энди суд тергов даври учун эҳтиёт чорасини танлаш масаласини ҳал қилади.

Маълумот учун, 2010 йил апрель ойи воқеаларида Қурманбек Бакиев президентликдан ағдарилган ва Роза Отунбаева бошчилигидаги муваққат ҳукумат ҳокимият тепасига келган. Азимбек Бекназаров ўша пайтда Вазирлар Маҳкамаси раҳбари ўринбосари лавозимида ишлаган.

Эслатиб ўтамиз, аввалроқ 2005 йил 24 мартда мамлакатдаги “Лола инқилоби” оқибатида ҳокимиятдан ағдарилган Асқар Акаев Жогорку Кенешга собиқ президент мақомини тиклашни сўраб мактуб йўллаган эди.