Қашқадарёда 480 млн сўмлик экологик зарар етказганлар ушланди (видео)

Қашқадарё вилоятининг Яккабоғ туманидаги муҳофаза этиладиган давлат ўрмон хўжалиги ҳудудида ноқонуний кўмир қазиб олиш ва дарахтларни кесиш ҳолати аниқланди. Табиатга етказилган зарар 480 миллион сўмдан ошган. Бу ҳақда вилоят Ички ишлар бошқармаси хабар берди.

Аниқланишича, “Mega Asia Salt and Quartz” хусусий заводи мансабдор шахслари геологик ўрганиш учун берилган рухсатномадан ўзбошимчалик билан фойдаланиб, “Зармарс” кўмир конида қазиб олинган кўмирни сотиш билан шуғулланган.

Ички ишлар вазирлиги Тезкор-қидирув департаменти ҳамда Қашқадарё вилояти ИИБ Тезкор-қидирув хизмати ходимлари ўтказган тадбирда завод ишчиси Холмирзаев 500 тонна ноқонуний қазиб олинган кўмирни 350 миллион сўмга сотишга келишгани аниқланган. У пулдан 50 миллион сўмни олаётган вақтда ашёвий далиллар билан қўлга олинган.

Шунингдек, кўмир конига йўл қуриш баҳонасида 24 туп нодир Зарафшон арчаси, 9 туп учқат дарахти ва 3 мингга яқин бута илдизи билан қўпориб ташланган.

Билдирилишича, мазкур ҳолат юзасидан корхона раҳбари Жомбоев ва бошқаларга нисбатан Жиноят кодексининг 229-моддаси (Ўзбошимчалик) ҳамда 198-моддаси (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) учинчи қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Тошкент шаҳрининг Яшнобод туманида кўп қаватли уйлар қураётган корхона 51 туп дарахтни рухсатсиз кесиб ташлади. Қурилиш майдонида бошқа экологик қонунбузарликлар ҳам аниқланиб, корхонага 5,1 млрд сўмдан ортиқ тўлов ва зарарни қоплаш мажбурияти юклатилгани ҳақида хабар берилган эди.