Исроил Сурия флоти йўқ қилинганини эълон қилди

Исроил ҳарбийлари Сурия ҳарбий-денгиз кучлари кемаларига бир неча бор ҳужум уюштирди. Буни бугун, 10 декабрь куни Исроил Мудофаа вазири Исроил Кац тасдиқлади.

“Сўнгги кунларда ЦАХАЛ Сурияда Исроил давлатига таҳдид солувчи стратегик объектларга зарба бериш ва йўқ қилиш мақсадида операциялар ўтказмоқда. Кеча тунда денгиз флоти Сурия флотини йўқ қилиш бўйича муваффақиятли операция ўтказди”, деди у.

Кац Исроил денгиз флотининг мамлакат шимолидаги Ҳайфадаги ҳарбий-денгиз базасига ташриф буюрди.

Унинг сўзларига кўра, Сурия ва Голан тепаликлари ўртасида қуролсизлантирилган буфер зона ташкил этилган. “Reuters”нинг хабар беришича, Кац Исроилга ҳар қандай террорчилик таҳдидининг олдини олиш учун Сурия жанубида Исроилнинг доимий иштирокисиз “стерил мудофаа зонаси” яратишни буюрган.

Шу билан бирга Кац Суриядаги янги ҳокимиятларни огоҳлантириб, Исроилга таҳдид соладиган ҳар қандай ташкилот шафқатсиз ҳужумга дучор қилинишини айтган.

“Башар Асад изидан юрган ҳар бир киши худди Асад каби тугайди. Биз экстремистик исломий террорчи тузилманинг Исроилга қарши ўз чегараларидан ташқарида ҳаракат қилишига йўл қўймаймиз... Биз таҳдидни бартараф этиш учун ҳамма нарсани қиламиз”, деган Мудофаа вазири.

Маълумот учун, “Ҳаят Таҳрир аш-Шом” бошчилигидаги қуролли гуруҳлар ноябрь ойи охирида Башар Асад ҳукумат кучларига қарши кенг кўламли ҳужум бошлаганди. Бир неча кун ичида улар мамлакатнинг иккинчи йирик шаҳри Ҳалабга кириб, яна бир қанча йирик марказларни ўз назоратига олишга муваффақ бўлди. 8 декабрь куни исёнчилар Дамашқдан давлат телевидениеси орқали Асад режимини ағдарганликларини эълон қилди. У оиласи билан Россияга учиб кетди.

Бугун, 10 декабрь куни Дамашқда банклар ва дўконлар қайта очилган, светофорлар ишлай бошлади. Шаҳарда қуролланганлар сони сезиларли даражада камайди. Исёнчиларга яқин икки манбанинг айтишича, қўмондонлик жангчиларга шаҳарни тарк этишни буюрган.

Эслатиб ўтамиз, олдинроқ “Ҳаят Таҳрир аш-Шом” етакчиси Абу Муҳаммад ал-Жалонийнинг яқин ҳамкори экани айтилаётган Муҳаммад ал-Башир Суриянинг янги муваққат бош вазири бўлганди.