Исландияда илк бор чивин аниқланди

Олимлар Исландия давлатида тарихда биринчи марта чивинни аниқлади. Бу ҳақда CNN хабар берди.

Маълумотларга кўра, жорий йилнинг 16 октябрь куни табиатшунос олим Бёрн Хялтасон Исландиянинг Кжос шаҳрида, пойтахт Рейкьявикдан 20 миль шимолда учта чивинни топган. У Исландия Табиатшунослик институтининг энтомологи Матиас Алфредссон билан боғланган ва улар жами учта, иккита урғочи ва бир эркак чивинни тутган.

Шунингдек, Алфредссон кўп йиллар олдин ҳам мамлакатнинг Кефлавик халқаро аэропортида самолётда бошқа турдаги битта чивин топилганини айтган.

“Бу Исландияда табиий муҳитда пайдо бўлган чивинларнинг биринчисидир. Бу тур совуқроқ иқлимга яхши мослашган кўринади, катталари ёпиқ жойларда совуқдан чиқиши мумкин. Улар ҳарорат тушганда узоқ ва қаҳратон қишларда ҳам омон қолиши  мумкин”, дейди олим.

Алфредссоннинг таъкидлашича, чивинларнин пайдо бўлишида иқлим ўзгариши роль ўйнаганига ишончи комил эмас, аммо иссиқлик ҳароратининг кўтарилиши Исландияда бошқа чивин турларининг пайдо бўлиши эҳтимолини ошириши мумкин. Улар Исландияга қандай келиб қолгани номаълум, бироқ олимлар уларни кема ва контейнерлар орқали келган деб таҳмин қилмоқда.

Эслатиб ўтамиз, аввалроқ Буюк Британияда 35 ёшли раққоса аёл Анголадаги гастроли чоғида чивин чақиши оқибатида комага тушган ва оёқ қўлидан айрилган эди.

Бунёд Келдибоев