Google миллионлаб махсус чивинларни табиатга қўйиб юбормоқчи

Google хавфли касалликларга қарши курашиш мақсадида Калифорния ва Флорида штатларида махсус ишлов берилган 32 миллионгача чивинни табиатга қўйиб юборишни режалаштирмоқда. Бу ҳақда “New York Post” хабар берди.

АҚШда жамоат соғлиқни сақлаш соҳасидаги энг ғайриоддий лойиҳалардан бири муҳокама қилинмоқда. Google яқин икки йил ичида Калифорния ва Флоридада 32 миллионгача чивинни очиқликка қўйиб юбориш учун рухсат сўради.

Ушбу ташаббус чивинлар орқали юқадиган касалликларга қарши курашишга қаратилган. Гап, хусусан, Ғарбий Нил вируси, денге безгаги, Зика вируси, чикунгунья ва сариқ иситма ҳақида бормоқда.

Лойиҳа ҳозирда АҚШ Атроф-муҳитни муҳофаза қилиш агентлиги томонидан кўриб чиқилмоқда. Идора 5 июнгача жамоатчилик фикри ва шарҳларини қабул қилади, шундан сўнг ушбу тажрибани ўтказишга рухсатнома бериш-бермаслик тўғрисида қарор қабул қилади.

Тадқиқотчиларнинг маълумотларига кўра, дастур Ғарбий Нил вируси ва Сент-Луис энцефалити ташувчиси ҳисобланган Culex уруғига мансуб чивинларни нишонга олган. Бу инфекциялар Калифорниядаги маҳаллий қушлар ва чивинлар популяцияси орасида аллақачон учраб турибди.

Шу билан бирга, компания одамларни чақадиган ҳашаротларни қўйиб юборишни режалаштирмаяпти. Гап Wolbachia бактерияси билан зарарланган эркак чивинлар ҳақида кетмоқда. Улар ёввойи урғочи чивинлар билан жуфтлашгандан сўнг, уларнинг насли яшаб қола олмайди, бу эса чивинлар популяцияси сонини босқичма-босқич камайтириш имконини беради.

Google компаниясига кўра, чивинларни кўпайтириш ва уларни табиатга қўйиб юбориш жараёнида сунъий интеллект тизимлари ҳамда роботлаштирилган технологиялардан фойдаланилади.

Эслатиб ўтамиз, аввалроқ иқлим ўзгариши туфайли чикунгунья вирусининг тарқалиш майдони сезиларли даражада кенгайиб, ХХI аср охирига бориб Европа, Шимолий Америка ва Шарқий Осиёнинг мўътадил минтақаларига етиб бориши мумкинлиги ҳақида хабар берилган эди.