iPhone трагедияси: телефон сабаб бир оила жарликдан қулаб, ҳалок бўлди (видео)

Ҳиндистоннинг Маҳараштра штатида бир оила одамлар кўз ўнгида жарликдан қулаб, ҳалок бўлди. Фожиага ўғилнинг муддатли тўлов эвазига сотиб олинган iPhone телефони учун пул топа олмагани сабаб бўлган. Бу ҳақда NDTV хабар берди.

Нашрнинг ёзишича, 18 ёшли Кунал iPhone сотиб олган, аммо ойлик бўлиб тўлаш (муддатли тўлов) бадалларини тўлашга қурби етмаган. Кеча, 22 август куни полиция берган маълумотга кўра, бу ўсмир ва унинг оиласи ўртасидаги жанжалга сабаб бўлиб, охир-оқибат катта фожиага олиб келган. Кунал ва унинг отаси қоядан йиқилиб ҳалок бўлган, уларнинг ортидан эса онаси ҳам қоядан сакради.

“Онанг учун яша”, дейди бир киши ўзини ташлаш билан таҳдид қилаётган Куналга. У эса жавобан: “Йўқ, мен ўлишим керак. Ягона йўл шу бўлиб қолди”, дейди. Орадан кўп ўтмай, унинг отаси Мурлидхар Чандгуде ўғлини фикридан қайтаришга ва орқага тортиб олишга ҳаракат қилган, аммо иккаласи ҳам пастга йиқилиб тушган, онаси Сангита эса уларнинг ортидан сакраган.

Тисгаон қишлоғининг собиқ оқсоқоли Санжай Жадхав Кунални фикридан қайтаришга уринганлар орасида бўлган. Бошқалар унга ҳатто iPhone 15 Pro олиб беришни ваъда қилган.

“Биз унга жуда кўп ялиндик, онасига қарашини, сакрамаслиги кераклигини, маълумотли эканини ва олдинда келажаги кутаётганини айтдик. Қўлимиздан келганча ёлвордик”, дейди Жадхав.

Музокараларнинг катта қисмида Кунал шунчаки елка қисиб, ўлим ягона йўл эканини таъкидлашда давом этган.

Полиция мулозимларининг сўзларига кўра, Кунал iPhone сотиб олган ва оиласидан муддатли тўловни амалга ошириш учун пул сўраб келган. Бу охирги тўлов бўйича отаси билан кескин тортишувга олиб келган, шундан сўнг ғазабланган Кунал эрталаб соат 10 лар атрофида уйидан чиқиб кетиб, яқин атрофда жойлашган тоққа чиқиб олган.

Ота-онаси унинг ортидан етиб борган ва бошқа маҳаллий аҳоли билан биргаликда қарийб уч соат давомида уни пастга тушишга кўндиришга ҳаракат қилган. Воқеа жойида полиция ва ёнғин хавфсизлиги ходимлари ҳам бўлганига қарамай, нега хавфсизлик тўри ўрнатилмагани номаълумлигича қолмоқда.

Соат 1 лар атрофида, музокаралар бошланганидан қарийб уч соат ўтиб, Куналнинг отаси ўғли турган жойга чиқиб, уни тортиб олишга уринган. Ушбу жараёнда ота ҳам, ўғил ҳам мувозанатни йўқотиб, пастдаги жарликка йиқилган. Эри ва ўғлининг йиқилганини кўрган Сангита бир неча сониядан сўнг тоғдан сакраган. Учаласи ҳам воқеа жойида ҳалок бўлган. Полиция мурдаларни олиб чиқиб, суд-тиббий экспертизасига юборган. Ҳолат юзасидан иш қўзғатилиб, суриштирув ҳаракатлари давом этмоқда. Ушбу ҳодисага бир неча соат давом этган музокаралар пайтида у ерга тўпланган кўплаб маҳаллий аҳоли ва туристлар гувоҳ бўлган, Кунални фикридан қайтаришга бўлган уринишларнинг баъзи қисмлари видеога олинган. Полиция оилавий низо тафсилотлари ёки ўсмир аввал хабар қилинганидек депрессиядан азият чеккан-чекмагани ҳақида қўшимча маълумотларни ҳали ошкор қилгани йўқ.