Инфантинонинг собиқ севгилисига “олти хонали” компенсация тўлангани очиқланди

FIFA президенти Жанни Инфантино UEFA’да раҳбарлик лавозимида ишлаган даврида собиқ севгилисига компенсация тўланишига эришган. Бу ҳақда “The Telegraph” хабар берди.

Манбага кўра, аёл ташкилотнинг маъмурий офисида ишлаган. Инфантино билан муносабатлари бошланганидан сўнг, у раҳбарлик лавозимига кўтарилган. Натижада унинг маоши 30 фоизга ошиб, 160 минг Швейцария франкига етган.

UEFA’нинг собиқ президенти Мишель Платини Инфантинонинг ходим билан ишқий муносабатда бўлганидан норози бўлган. Оқибатда аёлнинг ташкилотдаги фаолиятини якунлаш ва унга компенсация тўлаш тўғрисида қарор қабул қилинган.

FIFA’нинг амалдаги президентининг собиқ ҳамкасблари тўлов миқдори “камида олти хонали сумма” бўлганини таъкидлаган.

Бундан ташқари, UEFA аёлнинг MBA дастурида ўқиши учун йилига 45 минг фунт стерлинг тўлаган.

UEFA ушбу келишувни тасдиқлаган ва ходимнинг Инфантино билан ишқий муносабатлари ҳақидаги гап-сўзлардан хабардор бўлганини маълум қилган. Ташкилот, шунингдек, ички қоидалар “замонавий ва нуфузли ташкилот стандартларига жавоб бериши учун” кучайтирилганини таъкидлаган.

Маълумот учун, Жанни Инфантино UEFA’да 2000 йил августидан иш бошлаган. У 2009 йилдан 2016 йилгача ташкилот бош котиби лавозимида фаолият юритган. 2016 йил февралида эса FIFA президенти этиб сайланган.