Инфантино FIFA президенти лавозимини тарк этиши мумкин

Жанни Инфантино яқин орада FIFA президенти лавозимини тарк этиши мумкин. Бу ҳақда журналист Ромен Молина ўзининг X ижтимоий тармоғида хабар қилди.

Манбага кўра, Инфантино FIFA раҳбариятининг қўллаб-қувватлашини ҳамда ташкилот устидан назоратни йўқотган. Шу боис унинг истеъфоси яқин вақт ичида амалга ошиши мумкинлиги айтилмоқда.

Эслатиб ўтамиз, жорий йилнинг апрель ойида Инфантино 2027 йил 18 март куни Марокашда бўлиб ўтадиган сайловда FIFA президенти лавозими учун яна номзодини қўйиш нияти борлигини маълум қилган эди.

56 ёшли Инфантино 2016 йил февралида бўлиб ўтган навбатдан ташқари конгрессда FIFA президенти этиб сайланган. У коррупция можаролари ортидан истеъфога чиққан Зепп Блаттер ўрнини эгаллаган. Кейинчалик Инфантино 2019 ва 2023 йилларда рақобатчисиз равишда яна FIFA президенти этиб қайта сайланган.

Аввалроқ, Инфантино Жаҳон чемпионатининг тижорат ҳуқуқларидаги улушни хусусий инвесторларга сотиш режасини кўриб чиқаётгани ҳақида хабарлар тарқалган эди. FIFA’нинг ҳисоб-китобларига кўра, ушбу лойиҳа орқали 4,2 миллиард доллар маблағ жалб қилиниши мумкин.

Бироқ, мазкур ташаббус кўплаб футбол ташкилотлари ва федерациялар томонидан кескин танқид қилинди.

Жумладан, Европа футбол иттифоқи (UEFA) FIFA ҳомийлигидаги мусобақаларни бойкот қилишини маълум қилган бўлиб, бу қарор ташкилотнинг барча 55 аъзоси томонидан қўллаб-қувватланган. Шунингдек, Шимолий, Марказий Америка ва Кариб денгизи футбол конфедерацияси (КОНКАКАФ) ҳам ушбу таклифни рад этган. Осиё футбол конфедерацияси эса FIFA’да бошқарув ислоҳотларини амалга оширишга чақирган.